जगातील ११६ देशांमध्ये Mpox विषाणूचा कहर; जाणून घ्या, भारतातील स्थिती अन् लक्षणं काय आहेत?

Mpox : भारतात सध्या या रोगाचा प्रादुर्भाव काय आहे? असा प्रश्न प्रत्येकाच्या मनात येत आहे.

Mpox : नवी दिल्ली : कोरोना साथीतून जग आता पूर्णपणे सावरलं आहे. मात्र आता एक नवं संकट समोर आलं आहे. सध्या जगावर एमपॉक्स (Mpox) नावाच्या विषाणूचं संकट घोंघावत आहे. जगातील ११६ देशांमध्ये एमपॉक्स विषाणूचा प्रसार झाला आहे. एमपॉक्स विषाणूला आधी मंकीपॉक्स या नावानं ओळखलं जात होतं. जागतिक आरोग्य संघटनेनं (WHO) एमपॉक्स विषाणूचा कहर पाहता आपत्कालीन स्थिती जाहीर केली आहे. याचा त्रास झालेल्या व्यक्तीच्या शरीरावर पुरळ उठतात. हा विषाणू १९५८ मध्ये माकडांमध्ये सापडला होता. यानंतर तो मानवांमध्ये पसरू लागला आहे. 

भारतात सध्या या रोगाचा प्रादुर्भाव काय आहे? असा प्रश्न प्रत्येकाच्या मनात येत आहे. मात्र, सध्या भारतात या विषाणूचा प्रभाव दिसून येत नाही. जागतिक आरोग्य संघटनेनं आपल्या ताज्या अपडेटमध्ये म्हटलं आहे की, भारतात जानेवारी २०२२ ते जून २०२४ दरम्यान एमपॉक्सची २७ प्रकरणे नोंदवली गेली आहेत. या विषाणूमुळे एका व्यक्तीचा मृत्यूही झाला होता. आरोग्य तज्ज्ञांचं म्हणणं आहे की, भारतात या प्रकारच्या विषाणूपासून कोणताही धोका होण्याची शक्यता नाही. त्यावर उपचार करू शकणाऱ्या काही लसी उपलब्ध आहेत. याशिवाय, आंतरराष्ट्रीय विमानतळांवर काटेकोर निरीक्षण करून आणि संक्रमित लोकांची वेळेवर ओळख करून व्हायरस नियंत्रित केला जाऊ शकतो.

WHO नं काय सांगितलं?
जागतिक आरोग्य संघटनेनं एमपॉक्स विषाणूचा कहर पाहता आपत्कालीन स्थिती जाहीर केली आहे. अनेक देशांमध्ये मंकी पॉक्सच्या रुग्णांमध्ये झपाट्यानं वाढ होत आहे. जागतिक आरोग्य संघटनेनं नागरिकांना सतर्क राहण्याच्या सूचना दिल्या आहेत. एमपॉक्स देखील संसर्गजन्य आजार आहे. त्यामुळे परिस्थिती बिघडू नये यासाठी जागतिक आरोग्य संघटनेनं नागरिकांना काळजी घेण्याचा सल्ला दिला आहे. आतापर्यंत अनेक लोकांमध्ये याचा संसर्ग दिसून आला आहे. 

काँगोमध्ये ५०० हून अधिक लोकांचा मृत्यू 
काँगोमध्ये आतापर्यंत १४ हजारांहून अधिक रुग्ण आढळले आहेत. यामध्ये ५०० हून अधिक लोकांचा मृत्यू झाला आहे. १५ वर्षांखालील मुलीही या विषाणूचा बळी ठरत आहेत, ही चिंतेची बाब आहे. समलिंगी पुरुषांमध्ये या संसर्गाचं प्रमाण अधिक आहे. बाधित व्यक्तीच्या संपर्कातले आरोग्य कर्मचारी, कुटुंबीयांना देखील याचा धोका आहे. संसर्ग झाल्यानंतरही अंगावरील पुरळ पूर्ण बरे होईपर्यंत इतरांपासून दूर रहावं,  जागतिक आरोग्य संघटनेनं म्हटलं आहे.

दुसऱ्यांदा आणीबाणी जाहीर!
एमपॉक्स विषाणूचा धोका लक्षात घेता जागतिक आरोग्य संघटनेनं तीन वर्षांत दुसऱ्यांदा आणीबाणी जाहीर केली आहे. यापूर्वी २०२२ मध्येही या विषाणूचा वेगाने प्रसार दिसून आला होता. एमपॉक्स विषाणूनं १०० हून अधिक देशांमध्ये कहर केला होता. त्यावेळी २०० हून अधिक लोकांचा मृत्यू झाला होता. 

एमपॉक्सची लक्षणं
एमपॉक्स विषाणूमुळं व्यक्तीला त्वचेवर लाल पुरळ येतात, जे २-४ आठवडे राहू शकतात. या रुग्णाला ताप, घसा खवखवणं, डोकेदुखी, स्नायू दुखणे, पाठदुखी, अत्यंत थकवा येणं आणि सुजलेल्या लिम्फ नोड्स म्हणजेच शरीरावर गुठळ्या होऊ शकतात. एमपॉक्स असलेले बहुतेक लोक पूर्णपणे बरे होतात, परंतु काही गंभीर आजारी होऊ शकतात.