संजय राऊत व राघव चढ्ढा यांच्याविरोधात राष्ट्रीय बाल आयोगाचे पत्र, पोलिसांना कारवाई करण्याचे आदेश  

NCPCR Letter : संजय राऊत आणि आम आदमी पार्टीचे नेते राघव चढ्ढा व आतिशी यांच्यावर ट्विटरवर 'अल्पवयीन मुलांचे फोटो' शेअर केल्याप्रकरणी चौकशी करून आवश्यक कारवाई करण्यास सांगण्यात आले आहे.

नवी दिल्ली : राष्ट्रीय बाल हक्क संरक्षण आयोगाने (NCPCR) दिल्ली पोलिसांना पत्र लिहिले आहे. यामध्ये शिवसेना ठाकरे गटाचे नेते संजय राऊत आणि आम आदमी पार्टीचे नेते राघव चढ्ढा व आतिशी यांच्यावर ट्विटरवर 'अल्पवयीन मुलांचे फोटो' शेअर केल्याप्रकरणी चौकशी करून आवश्यक कारवाई करण्यास सांगण्यात आले आहे. तसेच, हे फोटो 'राजकीय अजेंडा पुढे नेण्यासाठी' शेअर केल्याचा आरोप राष्ट्रीय बाल हक्क संरक्षण आयोगाने केला आहे. 

याचबरोबर, पोलिसांना पाठवलेल्या पत्रानुसार, या दोन्ही नेत्यांनी कथितपणे फोटो शेअर करण्याचा उद्देश म्हणजे दिल्लीचे उपमुख्यमंत्री मनीष सिसोदिया यांच्या विरोधात सुरू असलेल्या सीबीआयच्या तपासापासून लक्ष हटवणे हा होता, असे राष्ट्रीय बाल हक्क संरक्षण आयोगाचे निरीक्षण आहे. दरम्यान, संजय राऊत आणि राघव चढ्ढा हे राज्यसभा सदस्य आहेत तर आतिशी दिल्लीतील सत्ताधारी आम आदमी पार्टीच्या आमदार आहेत.

राष्ट्रीय बाल हक्क संरक्षण आयोगाने दिलेल्या माहितीनुसार, संजय राऊत आणि राघव चड्ढा यांच्या सोशल मीडिया पोस्ट्सबद्दल तक्रारी आल्या आहेत. या दोघांनी त्यांच्या ट्विटरवर शेअर केलेल्या फोटोमध्ये मनीष सिसोदिया शाळेत अल्पवयीन विद्यार्थीनीसोबत दिसत आहेत. या प्रकरणाचा तपास आणि आवश्यक कारवाईसाठी दिल्लीच्या पोलिस आयुक्तांना पत्र लिहिले असून त्याची प्रत दिल्लीच्या मुख्य सचिवांना पाठवण्यात आली आहे. तसेच, आयोगाने दिल्ली पोलिसांना बाल न्याय कायद्यांतर्गत योग्य ती कारवाई करण्यास सांगितले आहे.

NCPCR writes to Delhi Police seeking inquiry and necessary action against Shiv Sena leader Sanjay Raut and AAP's Raghav Chadha for allegedly posting "picture of minor" on Twitter in "furtherance of political agenda"

— Press Trust of India (@PTI_News) March 3, 2023

 

दरम्यान, दिल्लीतील मद्य धोरण घोटाळ्याप्रकरणी सीबीआयने दिल्लीचे माजी उपमुख्यमंत्री मनीष सिसोदिया यांना 26 फेब्रुवारी रोजी अटक केली आहे. सिसोदिया यांच्या अटकेनंतर संजय राऊत यांनी एका चिमुकल्या विद्यार्थीनीसोबत संवाद साधत असलेल्या सिसोदिया यांचा फोटो शेअर करत केंद्र सरकारवर टीका केली होती. "भाजप ज्या प्रकारे विरोधी पक्षातील नेत्यांना अटक करत आहे ते पाहून मला भीती वाटते की, भविष्यात भाजपचे नेते सत्तेतून बाहेर पडल्यावर त्यांचे काय होईल. जर त्यांचा असाच छळ झाला तर? त्यांच्या मदतीला कोण येईल? असे ट्विट संजय राऊत यांनी केले होते.