दिल्लीत पुन्हा निर्भया, जीव वाचवण्यासाठी तरुणीची बाल्कनीतून उडी
By admin | Published: March 14, 2017 09:48 AM2017-03-14T09:48:17+5:302017-03-14T11:41:17+5:30
राजधानी दिल्ली पुन्हा एकदा बलात्काराने हादरली असून 28 वर्षीय तरुणीवर सामूहिक बलात्कार करण्यात आल्याची घटना समोर आली आहे
दिल्लीत पुन्हा निर्भया, जीव वाचवण्यासाठी तरुणीची बाल्कनीतून उडी
Next
नवी दिल्ली, दि. 14 - राजधानी दिल्ली पुन्हा एकदा बलात्काराने हादरली असून 28 वर्षीय तरुणीवर सामूहिक बलात्कार करण्यात आल्याची घटना समोर आली आहे. पूर्व दिल्लीत एका तरुणीवर पाच जणांनी बलात्कार केल्याची माहिती समोर आली आहे. तरुणीने दिलेल्या माहितीनुसार आरोपींमधील एका तरुणाने आपल्याला घरी सोडतो असं सांगून दुस-याच ठिकाणी नेलं, आणि तिथे पाच जणांनी मिळून आपल्यावर सामूहिक बलात्कार केला. बाल्कनीमधून उडी मारुन तरुणीने आपली सुटका करुन घेतली.
पोलिसांनी सर्व आरोपींना अटक केली आहे. यामधील तीन तरुण नोएडामधील बीपीओत काम करतात. एकजण दक्षिण दिल्लीतील फायनान्स कंपनीत काम करणारा आहे. पाचवा आरोपी बेरोजगार आहे. पीडित तरुणीचा घटस्फोट झाला असून तिला दोन मुलं आहे. रोजंदारीवर ती कम करुन आपलं आणि पोरांचं पोट भरते.
पीडित तरुणीने दिलेल्या माहितीनुसार 'शनिवारी रात्री तिची आरोपींमधील ओळखीच्या असलेल्या तरुणाची भेट झाली. पण जेव्हा ती कारमध्ये बसली तेव्हा अजून दोघेजण आधीच त्यामध्ये होते'.
'आपल्या मित्राला पांडव नगरमध्ये सोडायचं असल्याचं सांगून आपल्याला जबरदस्ती तिथे नेलं. तिथे पोहोचल्यावर जबरदस्ती करत मला नेलं आणि माझ्यावर बलात्कार केला. माझी शुद्ध हरपल्यानंतर मला एका खोलीत बंद करण्यात आलं. रविवारी सकाळी मला जाग आल्यानंतर मी मदतीसाठी आरडाओरड केली, पण मदत मिळाली नाही. आरोपी तरुण परत आल्यावर जेव्हा त्यांनी बाल्कनीचा दरवाजा उघडला तेव्हा सुटकेसाठी बाल्कनीतून खाली उडी मारली', असं पीडित तरुणीने सांगितलं आहे.
तरुणीला बाल्कनीतून उडी मारताना एका व्यक्तीने पाहिलं आणि पोलिसांना कळवलं. धक्कादायक म्हणजे तरुणी नग्न अवस्थेत रस्त्यावर मदतीसाठी याचना करत होती, मात्र कोणीही तिला मदत केली नाही. अखेर एका रिक्षावाल्याने तिचं म्हणणं ऐकून घेतलं आणि तिला मदत केली. त्यानंतर पोलिसांची टीम पोहोचली आणि तरुणीला रुग्णालयात दाखल केलं. तरुणीला रुग्णालयात भर्ती करण्यात आलं असून तिच्यावर उपचार सुरु आहे. तिला काही गंभीर जखमा झाल्या आहेत.
