व्हॅलेंटाइन डे दिवशी गावकऱ्यांसमोर विवाहित प्रेयसीला म्हणाला I Love You, त्यानंतर...

Relationship News: विवाहित प्रेयसीने प्रेमास नकार दिल्याने एका प्रियकराने प्रेयसीच्या घरासमोरच जीवण संपवण्याचा प्रयत्न केला.

काल जगभरात व्हॅलेंटाइन डे उत्साहात साजरा झाला. अनेक प्रेमवीरांनी त्यांच्या प्रेयसींसमोर आपल्या प्रेमाची मागणी घातली. दरम्यान, उत्तर प्रदेशमधील हरदोई जिल्ह्यामध्ये व्हॅलेंटाइन डे दिवशी एक धक्कादायक घटना घडली आहे. विवाहित प्रेयसीने प्रेमास नकार दिल्याने एका प्रियकराने प्रेयसीच्या घरासमोरच आत्महत्या करण्याचा प्रयत्न केला. मिळालेल्या माहितीनुसार प्रियकर प्रेयसीला भेटण्यासाठी चाकू घेऊन तिच्या घरी गेला. त्यानंतर त्याने तिला सोबत येण्यास सांगितले. मात्र तिने नकार देताच या माथेफिरू प्रियकराने घटनास्थळावरच विषारी पदार्थ खाऊन आत्महत्या करण्याचा प्रयत्न केला. या दरम्यान तिथे गावातील लोकही जमा झाले होते. त्यांनी या प्रियकराला तातडीने रुग्णालयात दाखल केले. तसेच या घटनेची सूचना पोलिसांना दिली.

हा धक्कादायक प्रकार हरदोई जिल्ह्यातील बिलग्राम परिसरातील दुर्गागावामध्ये घडला. विवाहित प्रेयसी काही वर्षांपासून माहेरी राहत होती. ततौरा गावातील रहिवासी असलेला सुधीर कुमार व्हॅलेंटाइन डे दिवशी आपल्या विवाहित प्रेयसीच्या घरी पोहोचला. त्याने आपल्या प्रेमाचा हवाला देऊन तिला सोबत येण्यास सांगितले. तसेच त्याने आपल्या प्रेमप्रकरणाबाबत गावकऱ्यांनाही कल्पना दिली. मात्र प्रेयसीने त्याच्यासोबत जाण्यास नकार दिला. त्यामुळे संतापलेल्या सुधीर याने विषप्राशन करून आत्महत्या करण्याचा प्रयत्न केला.

रुग्णालयात दाखल करण्यात आलेल्या सुधीरने सांगितले की, तो प्रेसयीच्या पतीसोबत राजस्थानमध्ये नोकरी करत होता. यादरम्यान तिच्यात आणि त्याच्यात जवळीक निर्माण झाली. त्यानंतर ही महिला पतीपासून वेगळी झाली आणि माहेरी येऊन राहिली. सुधीरने सांगितले की तो प्रेयसीचा सर्व खर्च करायचा. तो सोमवारी तिला भेटला होता. तसेच व्हॅलेंटाइन डे दिवशी भेटण्यासही सांगितले. मात्र ती भेटली नाही. तेव्हा तो तिच्या गावातील घरी गेला आणि सर्वांसमोर त्याने आपल्या प्रेमाची कबुली दिली. त्यानंतर विषारी पदार्थ खाऊन आत्महत्येचा प्रयत्न केला.