खेळण्यातल्या बंदुकीने आजी-आजोबाला लुटण्याचा प्रयत्न, नातवाला अटक

दिल्ली, दि. 12 - देशाची राजधानी दिल्लीमध्ये एक धक्कादायक घटना उघडकीस आली आहे. खेळण्यातील बंदूक दाखवून स्वतःच्याच वृद्ध आजी- आजोबांना लुटण्याचा प्रयत्न करणा-या नातवाला आणि त्याच्या साथीदाराला पोलिसांनी अटक केली आहे. पोलीस आरोपींची चौकशी करत आहेत. 

 

मिळालेल्या माहितीनुसार, दिल्लीच्या रोहीणी सेक्टर 7 येथे ही धक्कादायक घटना घडली. येथे राहणारे रामलाल मिगलान (वय-90) यांचा नातू रजत(वय-21) याने त्याचा सहकारी ऋषभ (वय- 23) याला शनिवारी संध्याकाळी आपल्या घरी पाठवलं. गॅस सिलेंडरची तपासणी करण्याच्या बहाण्याने ऋषभ घरात शिरला. ऋषभला घेवून रामलाल स्वयंपाक घरात गेले असता रजतने हेल्मेट घालून घरात प्रवेश केला. त्याने आपल्या शकुंतला देवी या 84 वर्षाच्या आजीला गळा दाबून मारण्याचा प्रयत्न केला. जीव वाचवण्यासाठी आजीने आरडा-ओरड केली. पत्नीचा आवाज ऐकून शंका आल्यामुळे  रामलाल यांनी स्वयंपाक घरातच ऋषभला पकडून ठेवलं आणि मदतीसाठी आरडा-ओरड केली. त्यांचा आवाज ऐकून शेजारी आले आणि त्यांनी दोन्ही तरूणांना पकडलं आणि पोलिसांच्या ताब्यात दिलं.

 

पोलिसांनी केलेल्या चौकशीत दोघांनी आपला गुन्हा कबूल केला. घराची विक्री करून आजी-आजोबांना मोठी रक्कम मिळाली होती त्यामुळे त्यांमना लुटण्याची योजना आखल्याचं त्यांनी सांगितलं. वृद्ध आजी-आजोबांना लुटण्यासाठी खेळण्यातील बंदूक आरोपिंनी विकत घेतली होती. त्यांच्याकडून पोलिसांनी ही बंदूक जप्त केली आहे.