राजकारणातील दिग्गजांकडून लोकमतला कौतुकाची थाप

दिल्लीच्या विज्ञान भवनात लोकमतकडून पहिला-वहिला संसदीय पुरस्कार सोहळा संपन्न झाला.

 ऑनलाइन लोकमत

नवी दिल्ली, दि. 19 - दिल्लीच्या विज्ञान भवनात लोकमतकडून पहिला-वहिला संसदीय पुरस्कार सोहळा संपन्न झाला. भारतातील प्रसारमाध्यमांद्वारे संसद सदस्यांना राजधानीत विशेष पुरस्काराने सन्मानित करण्याच्या या पहिल्याच व ऐतिहासिक सोहळ्याचं राजकारणातल्या दिग्गज नेत्यांनी तोंडभरून कौतुक केलं. 

 

लोकसभेचे माजी अध्यक्ष व माजी गृहमंत्री शिवराज पाटील, केंद्रीय भूतल परिवहनमंत्री नितीन गडकरी, भाजपाचे उपराष्ट्रपतिपदाचे उमेदवार व्यंकय्या नायडू यांनी लोकमतचे आभार मानले.  संसदपटूंचा अशाप्रकारे सन्मान करणं खरंच कौतूकास्पद आहे. एखाद्या वृत्तपत्रसमुहाने खासदारांच्या सन्मानासाठी घेतलेला पुढाकार खरोखरंच उल्लेखनीय आहे असं म्हणत या सर्वांनी लोकमतला कौतुकाची थाप दिली. 

 

लोकमत संसदीय पुरस्कार सोहळ्याला सुरूवात-

 दिल्लीच्या विज्ञान भवनात लोकमत संसदीय पुरस्कार सोहळ्याला सुरूवात झाली आहे.भारतातील प्रसारमाध्यमांद्वारे संसद सदस्यांना राजधानीतविशेष पुरस्काराने सन्मानित करण्याची ही पहिलीच वेळ आहे.  लोकमत वृत्तपत्र समूह यापुढे दरवर्षी संसदीय पुरस्कार देणार आहे. लोकमत वृत्तपत्र समूहातर्फे लोकसभा व राज्यसभेतील प्रत्येकी प्रत्येकी ४ अशा ८ आदर्श सदस्यांचा उपराष्ट्रपती हमीद अन्सारी यांच्या हस्ते लोकमत संसदीय पुरस्कार देऊन सन्मान करण्यात येत आहे. 

 

भाजपाचे ज्येष्ठ नेते व लोकसभा सदस्य लालकृष्ण अडवाणी आणि संयुक्त जनता दलाचे नेते व राज्यसभा सदस्य शरद यादव यांना जीवनगौरव पुरस्कार देऊन सन्मानित केले जाणार आहे. सर्वोत्कृष्ट संसदपटू म्हणून एन.के. प्रेमाचंद्रन (लोकसभा सदस्य) व सीताराम येचुरी (राज्यसभा सदस्य) यांना दिला जाईल. सर्वोत्कृष्ट महिला संसदपटू हा पुरस्कार सुश्मिता देव (लोकसभा) व जया बच्चन (राज्यसभा) यांना दिला जाणार असून, पदार्पणातील सर्वोत्कृष्ट महिला संसदपटू या पुरस्काराने मीनाक्षी लेखी (लोकसभा) व रजनी पाटील (राज्यसभा) यांचा गौरव केला जाणार आहे.

 

लोकमतच्या या सोहळ्यास उपराष्ट्रपती अन्सारींव्यतिरिक्त माजी पंतप्रधान डॉ. मनमोहन सिंग व एच.डी. देवेगौडा, अर्थमंत्री अरुण जेटली, माजी नगरविकासमंत्री व उपराष्ट्रपतिपदाचे उमेदवार व्यंकय्या नायडू, काँग्रेसचे लोकसभेतील गटनेते मल्लिकार्जुन खरगे, विरोधी पक्षनेते गुलाम नबी आझाद, भूतल परिवहनमंत्री नितीन गडकरी, भाजपाचे ज्येष्ठ नेते डॉ. मुरली मनोहर जोशी व माजी लोकसभाध्यक्ष शिवराज पाटील हे प्रमुख अतिथी म्हणून उपस्थित आहेत. लोकमत संसदीय पुरस्कार सोहळ्याला शरद पवार, फारुख अब्दुल्ला, जया बच्चन हेसुद्धा उपस्थित आहेत. 

या ज्युरींनी केली निवड-

देशातील मान्यवर नेते, संसदेचे माजी सचिव व पत्रकारांच्या स्वतंत्र ज्युरी मंडळाला पुरस्कारयोग्य संसद सदस्यांची निवड करण्याची जबाबदारी लोकमतने सोपवली होती. सुमारे ९ तासांच्या चर्चेनंतर ज्युरींनी ८ संसद सदस्यांची निवड केली. ज्युरी मंडळाचे अध्यक्षपद लोकसभेचे माजी अध्यक्ष व माजी गृहमंत्री शिवराज पाटील यांनी भूषवले. ज्युरी मंडळामध्ये डॉ. मुरली मनोहर जोशी, मल्लिकार्जुन खरगे, सीताराम येचुरी, शरद यादव, माजी लोकसभा सचिव सुभाष कश्यप, इंडिया टीव्हीचे संपादक रजत शर्मा, इंडिया टुडेचे राजकीय संपादक राजदीप सरदेसाई, लोकमत वृत्तपत्र समूहाचे अध्यक्ष विजय दर्डा व सदस्य सचिव पत्रकार हरीश गुप्ता यांचा समावेश होता.