Punjab: पंजाबमध्ये आपच्या महिला आमदाराला पतीची मारहाण

Punjab AAP MLA: पंजाबमध्ये आम आदमी पार्टीच्या एका महिला आमदाराला पतीने मारहाण केल्याचा व्हिडिओ व्हायरल होत असून, राज्य महिला आयोगाने याची दखल घेतली आहे.

- बलवंत तक्षक
चंडीगड : पंजाबमध्ये आम आदमी पार्टीच्या एका महिला आमदाराला पतीने मारहाण केल्याचा व्हिडिओ व्हायरल होत असून, राज्य महिला आयोगाने याची दखल घेतली आहे. आयोगाच्या अध्यक्षा मनीषा गुलाटी यांनी म्हटले आहे की, आजवर हे प्रकरण चार भिंतींमध्ये होते; परंतु आता व्हिडिओ व्हायरल झाल्यामुळे आयोग कारवाई करणार आहे.

घरगुती हिंसाचाराची शिकार झालेल्या आ. प्रो. बलजिंदर कौर आहेत. त्या तलवंडी साबो मतदारसंघातून दुसऱ्यांदा निवडून आल्या आहेत. व्हायरल झालेल्या व्हिडिओमध्ये त्यांचे पती सुखराज बल त्यांना थप्पड लगावताना दिसत आहेत. हा व्हिडिओ जुलै महिन्यातील असून, त्याचे सीसीटीव्ही रेकॉर्डिंग आता समोर आले आहे. पतीशी वादानंतर बलजिंदर कौर माहेरी निघून गेल्या. त्यांचे पती सुखराज बल यांच्याकडून कोणतीही प्रतिक्रिया आलेली नाही.

मंत्री न झाल्यामुळे होत्या नाराज
प्रो. बलजिंदर कौर आप सरकार स्थापनेच्या कालावधीत मंत्रिपदाच्या शर्यतीत होत्या परंतु त्यांना मंत्रिपद मिळाले नाही. याबद्दल त्यांनी अनेकदा नाराजी व्यक्त केलेली आहे. अलीकडे त्या राजकीय रूपाने सक्रियही नाहीत. महिला व बालविकास मंत्री डॉ. बलजित कौर यांनी म्हटले आहे की, बलजिंदर कौर यांच्याकडून कसलीही तक्रार प्राप्त झालेली नाही.