Jaani Johan : "मी समोर अक्षरश: मृत्यू पाहिला अन्..."; भीषण अपघातानंतर गायक जानी जोहानची पोस्ट व्हायरल

Jaani Johan : मोहालीच्या सेक्टर 22 मध्ये दुसऱ्या वाहनाने धडक दिल्यानंतर या अपघातात जानीची एसयुव्ही कार पलटी झाली होती. त्यानंतर त्याला तातडीने रुग्णालयात दाखल करण्यात आलं.

पंजाबी गायक आणि गीतकार जानी जोहान (Jaani Johan) याच्या गाडीचा भीषण अपघात (road accident) झाला. मोहालीच्या सेक्टर 22 मध्ये दुसऱ्या वाहनाने धडक दिल्यानंतर या अपघातात जानीची एसयुव्ही कार पलटी झाली होती. त्यानंतर त्याला तातडीने रुग्णालयात दाखल करण्यात आलं. या अपघातानंतर आता जानीने सोशल मीडियावर पोस्ट लिहिली असून यामध्ये आपल्या तब्येतीची माहिती दिली. "आज मी समोर अक्षरश: मृत्यू पाहिला आणि नंतर देवाचं दर्शन झालं. मृत्यू आणि देव या दोघांना एकत्रच मी पाहिलं. मी आणि माझे मित्र ठीक आहोत" असं म्हटलं आहे. 

जानी जोहान "देवाच्या कृपेने अपघातावेळी कारमध्ये आम्ही जेवढे लोक होतो, ते सर्वजण ठीक आहोत. अधिकारी या प्रकरणात योग्य तो तपास करत आहेत आणि आम्हाला रुग्णालयातून डिस्चार्ज मिळाला आहे. वाहेगुरु ने राख ले. वाहेगुरु दा शुक्र है" असं म्हटलं आहे. जानीने पोस्ट शेअर केल्यानंतर लगेचच चाहत्यांनी त्याला लवकरात लवकर बरं होण्यासाठी शुभेच्छा दिल्या आहेत. 

भीषण अपघातात जानी आणि त्याचे मित्र थोडक्यात बचावले. जानीसह त्याच्या मित्रांना थोडीफार दुखापत झाली. त्यांना रुग्णालयातून डिस्चार्ज देण्यात आला आहे. अधिकाऱ्यांनी अपघाताबाबत दिलेल्या माहितीनुसार, जानीसह तिघं जण सेक्टर 91 च्या दिशेने जात असताना हा अपघात झाला. जेव्हा ते सेक्टर 88 लाइट पॉइंटवर पोहोचले तेव्हा फोर्ड फिगोने त्यांच्या एसयूव्हीला धडक दिली. त्यानंतर चालकाचं नियंत्रण सुटलं. ही टक्कर इतकी जोरात होती की SUV तीनदा पलटी झाली. 

सुदैवाने एअर बॅग्समुळे प्रवाशांचे प्राण वाचले. गाडीतून तीन जणांना तातडीने बाहेर काढण्यात आलं आणि त्यांना मोहालीतील फोर्टिज रुग्णालयात दाखल करण्यात आलं. जानी हा पंजाब आणि बॉलिवूडमधील लोकप्रिय गायक, संगीतकार आणि गीतकार आहे. तितलियाँ, नाह, पछताओगे, धोकेबाज, क्या बात है, फिलहाल, फिलहाल 2 यांसारख्या गाण्यांसाठी तो प्रसिद्ध आहे. एका हिंदी वेबसाईटने याबाबतचे वृत्त दिले आहे.