रेडिओ जॉकीच्या पत्नीची आत्महत्या

रेडिओ जॉकीबरोबर विवाह केल्यानंतर अवघ्या दोन महिन्यात विवाहीतेने दहा मजली इमारतीच्या गच्चीवरुन उडी मारुन जीवन संपवल्याची धक्कादायक घटना अहमदाबादमध्ये घडली आहे

 ऑनलाइन लोकमत 

अहमदाबाद, दि. २२ - शहरातील लोकप्रिय रेडिओ जॉकीबरोबर विवाह केल्यानंतर अवघ्या दोन महिन्यात विवाहीतेने दहा मजली इमारतीच्या गच्चीवरुन उडी मारुन जीवन संपवल्याची धक्कादायक घटना अहमदाबादमध्ये घडली आहे. भूमी देसाई असे मृत महिलेचे नाव असून, दोन महिन्यापूर्वीच तिचे रेडिओ जॉकी आरजे कुनालबरोबर लग्न झाले होते. 

गुरुवारी दुपारी दोन वाजण्याच्या सुमारास भूमी आत्महत्या करण्याच्या इराद्याने सचिन टॉवर येथे आपली गाडी घेऊन आली. आत्महत्या करण्यापूर्वी तिने मितेश सोनीला सचिन टॉवर येथून आत्महत्या करत असल्याचा मोबाईलवरुन एसएमएस पाठवला. दुपारी अडीजच्या सुमारास ती दहा मजली इमारतीच्या गच्चीवर गेली तिथून उडी मारुन तिने जीवन संपवले. 

नोव्हेंबर महिन्यातच भूमी आणि कुणालचे लग्न झाले होते. विवाहानंतर दोघे फिरण्यासाठी बँकॉकला गेले होते तिथून १८ जानेवारीला परतल्यानंतर ती आपल्या आई-वडिलांच्या निवासस्थानी रहात होती. थायलंड ट्रीपमध्ये दोघांमध्ये मतभेद झाल्याचे नातेवाईकांनी सांगितले. पोलिसांनी या प्रकरणी अपघाती मृत्यूची नोंद केली आहे.