खासदारांसाठी खुशखबर! आता संसदेच्या कॅन्टीन मेनूमध्ये दिसणार 'हे' खास पदार्थ
By ऑनलाइन लोकमत | Published: January 30, 2023 10:57 AM2023-01-30T10:57:10+5:302023-01-30T11:00:24+5:30
Parliament Millets Menu : रविवारीच (दि.२९) पंतप्रधान नरेंद्र मोदी यांनी 'मन की बात' कार्यक्रमात बाजरीचा उल्लेख केला होता.
खासदारांसाठी खुशखबर! आता संसदेच्या कॅन्टीन मेनूमध्ये दिसणार 'हे' खास पदार्थ
Next नवी दिल्ली : सध्या सरकार बाजरीचे उत्पादन आणि वापर वाढवण्यावर भर देत आहे. याच पार्श्वभूमीवर आता बाजरीपासून बनवलेल्या अनेक खास पदार्थांचा समावेश संसदेच्या कॅन्टीन मेनूमध्ये होणार आहे. इंडियन एक्स्प्रेस या इंग्रजी वृत्तपत्राने दिलेल्या माहितीनुसार, संसदेच्या कॅन्टीनच्या मेनूमध्ये लवकरच ज्वारीपासून तयार केलेल्या खाद्यपदार्थांपासून ते बाजरीची खिचडी, नाचणीचे लाडू आणि बाजरीचा चुरमा पाहायला मिळणार आहे. याशिवाय, मेन्यूमध्ये पारंपरिक बिर्याणी आणि कटलेटही असतील.
रविवारीच (दि.२९) पंतप्रधान नरेंद्र मोदी यांनी 'मन की बात' कार्यक्रमात बाजरीचा उल्लेख केला होता. 'मन की बात' या कार्यक्रमात पंतप्रधान नरेंद्र मोदी म्हणाले की, भारतात होणाऱ्या G20 शिखर परिषदेच्या प्रत्येक कार्यक्रमात बाजरीचे पदार्थ सादर केले जातील. लोकसभा अध्यक्ष ओम बिर्ला यांनीही खासदारांसाठी खास बाजरीच्या मेनूची मागणी केली आहे. त्यानंतर आता खासदार जुन्या मेनूशिवाय नवीन मेनूमधून आपल्या आवडीचे पदार्थ निवडू शकतील.
मेनूमध्ये बाजरीचे सूप, नाचणी डोसा, नाचणी तूप भाजणे, नाचणी थत्ते इडली, ज्वारीची भाजी उपमा हे स्टार्टर्स असतील. याशिवाय, मुख्य कोर्स म्हणून मका/बाजरी/ज्वारीच्या रोटीसोबत मोहरीच्या हिरव्या भाज्या, बटाटाच्या भाजीसोबत नाचणीची पुरी, बाजरीची मिक्स खिचडी आणि लसूण चटणीसोबत बाजरीची खिचडी असणार आहे. तसेच, मिठाईंमध्ये केसरी खीर, नाचणी- अक्रोडाचे लाडू आणि बाजरीचा चुरमा यांचा समावेश करण्यात आला आहे.
देशातील विविधतेचे दर्शन घडेल अशा पद्धतीने मेन्यूची रचना करण्यात आल्याचे सूत्रांनी सांगितले. मेनूमध्ये ओट्स मिल्क, सोया मिल्क, नाचणी-मटरचा शोरबा, बाजरी कांदा मुथिया (गुजरात), शाही बाजरीची टिक्की (मध्य प्रदेश), नाचणीचा डोसा आणि शेंगदाणा चटणी (केरळ), राजगिरा कोशिंबीर आणि कोरा बाजरी कोशिंबीर यांचा समावेश आहे.
कोणी तयार केला मेनू?
आयटीडीसीचे (ITDC) मोंटू सैनी यांनी खासदारांसाठी मिलेट्स मेनू तयार केला. मोंटू सैनी यांनी राष्ट्रपती भवनात एक्झिक्युटिव्ह शेफ म्हणून साडेपाच वर्षे काम केले आहे. यादरम्यान प्रणव मुखर्जी आणि रामनाथ कोविंद हे देशाचे राष्ट्रपती होते. आयटीडीसी 2020 पासून संसदेचे कॅन्टीन चालवत आहे. हिवाळी अधिवेशनात संसद भवनात खासदारांसाठी आयोजित केलेल्या स्नेहभोजनात नाचणी अक्रोडाचे लाडू आणि बाजरीचे सूप यांना सर्वाधिक मागणी असल्याचे ते म्हणाले.