बहिणीकडे जाण्याचा हट्ट,पतीने पत्नीला बाईकला बांधत फरफटत नेलं; मित्राने व्हायरल केला VIDEO

राजस्थानमध्ये पतीने पत्नीला बाईकच्या मागे बांधून जनावरासारखे ओढून नेल्याचा प्रकार समोर आला आहे.

Rajasthan Crime :राजस्थानातून माणुसकीला लाजवेल आणि पती-पत्नीच्या नात्याला कलंक लावणारी घटना समोर आली आहे. राजस्थानमध्ये एका व्यक्तीने आपल्याच पत्नीसोबत क्रूरतेच्या सर्व मर्यादा ओलांडल्या आहेत. पतीने पत्नीला मोटारसायकलला बांधून संपूर्ण गावात फरफटत नेल्याची खळबळजनक घटना घडली आहे. या घटनेचा व्हिडिओ सोशल मीडियावर व्हायरल झाल्यानंतर पोलिसांनी आरोपी पतीला अटक केली. दरम्यान हा व्हिडीओ महिन्याभरापूर्वीचा असल्याचे म्हटलं जात आहे.

राजस्थानच्या नागौरमध्ये आरोपी पतीने पत्नीला मोटारसायकलच्या मागे दोरीने बांधून गावात फरफटत नेले. हा सगळा प्रकार घडताना महिलेला वाचवण्याची तसदी कोणी घेतली नाही. सगळे त्याचे व्हिडिओ बनवत राहिले. मात्र रविवारी एका वादातून हा व्हिडीओ व्हायरल झाला आणि आरोपी पती प्रेमाराम मेघवाल याला अटक झाली. ही घटना महिन्याभरापूर्वी घडली होती आणि व्हिडीओ व्हायरल झाल्याने हा सगळा प्रकार उघडकीस आला.

पंचौरी पोलिस ठाण्याचे सहाय्यक उपनिरीक्षक सुरेंद्र कुमार यांनी दिलेल्या माहितीनुसार, ही घटना एक महिन्यापूर्वी नहरसिंहपुरा गावात घडली होती. आरोपी  प्रेमराम मेघवाल (३२) याने पत्नीला मोटारसायकलच्या मागे दोरीने बांधून गावात ओढूत नेले. कोणीतरी या घटनेचा व्हिडिओ बनवला, जो काल ऑनलाइन समोर आला. यानंतर पोलिसांनी या प्रकरणाचा तपास करून आरोपीला अटक केली. पीडिता सध्या तिच्या नातेवाइकांकडे राहत असून या प्रकरणाची माहिती पोलिसांना दिली नाही.

मिळालेल्या माहितीनुसार, प्रेमराम मेघवाल याच्या लग्नाला फक्त १० महिने झाले आहेत, मात्र तो पत्नीला सतत मारहाण करत असे. पत्नीने महिनाभरापूर्वी बारमेर येथे बहिणीच्या घरी जाण्याचा हट्ट धरला होता. पतीच्या नकारानंतरही ती गेली. यामुळे तो इतका संतापला की त्याने पत्नीला मोटरसायकलच्या मागे बांधून तिला ओढून नेण्यास सुरुवात केली.

महिन्याभराने व्हिडीओ आला समोर

दरम्यान, रविवारी संध्याकाळी दारू पिऊन प्रेमरामचे त्याच्या एका मित्राशी भांडण झाले होते. तेव्हा त्या मित्राने प्रेमरामचा हा व्हिडिओ व्हायरल केला होता.  त्यानंतर पंचौरी पोलीस स्टेशन परिसरात आणि नागौर मुख्यालयात खळबळ उडाली. पोलिसांनी तत्काळ कारवाई करत प्रेमरामला अटक केली.