मृत्यूचा 'ट्रेलर'! मुलीच्या परिक्षेसाठी निघालेल्या कुटुंबावर काळाचा घाला; मुलीसह ६ जणांचा मृत्यू

दुभाजक ओलांडून ट्रेलरची दोन वाहनांना धडक; भीषण अपघातात ६ जणांचा मृत्यू

सिरोही: राजस्थानच्या सिरोहीजवळ राष्ट्रीय महामार्गावर नियंत्रण सुटलेल्या एका ट्रेलरनं दोन कारना धडक दिली. या भीषण अपघातात ६ जणांचा मृत्यू झाला. तर ५ जण जखमी झाले आहेत. राष्ट्रीय महामार्ग क्रमांक-६२ वर एका ट्रेलरनं दुभाजक ओलांडला. त्यामुळे मोठा अपघात झाला. दुर्घटनेची माहिती मिळताच जिल्हाधिकारी आणि पोलीस अधीक्षक अपघातस्थळी पोहोचले. ट्रेलरचा चालक फरार असून पोलीस त्याचा शोध घेत आहेत.

पोलीस अधीक्षक धर्मेंद्र सिंह यांनी दिलेल्या माहितीनुसार, रविवारी सकाळी सिरोही येथील उथमण टोलनाक्याजवळ हा अपघात झाला. पालीहून सिरोहीला जाणाऱ्या एका ट्रेलरवरचं नियंत्रण सुटलं. हा ट्रेलर दुभाजक ओलांडून दुसऱ्या बाजूला गेला. समोरून येणाऱ्या दोन कारना ट्रेलरची धडक बसली. या अपघातात ६ जणांचा मृत्यू झाला.

अपघातात मृत्यूमुखी पडलेलं कुटुंब त्यांच्या मुलीची परीक्षा असल्यानं पालीला जात होतं. त्याचवेळी ट्रेलरनं त्यांच्या कारला धडक दिली. कॉन्स्टेबल पदासाठी परीक्षा द्यायला जाणाऱ्या सुगना नावाच्या तरुणीचा मृतांमध्ये समावेश आहे. ४ महिन्यांची चिमुकलीदेखील अपघातात मृत पावली. अपघातानंतर ट्रेलर चालक फरार झाला.