खासदाराच्या मुलीने फुटपाथवरच्या तरुणाला चिरडून मारलं; आरोपीला पोलीस ठाण्यातूनच मिळाला जामीन

चेन्नईत एका राज्यसभेच्या खासदाराच्या मुलीने फुटपाथवर झोपलेल्या एका माणसावर आपली बीएमडब्ल्यू चढवल्याची धक्कादायक घटना समोर आली आहे.

Chennai BMW Car Accident : पुणे पोर्श अपघात प्रकरणाने देशभरात खळबळ उडालेली असताना चेन्नईमध्येही हिट अँड रनचे हारदवणारे प्रकरण समोर आलं आहे. या प्रकरणात एका तरुणाचा नाहक बळी गेला. चेन्नईतीलराज्यसभा खासदाराच्या मुलीने बीएमडब्ल्यू कार फूटपाथवर झोपलेल्या व्यक्तीच्या अंगावर घालून त्याची हत्या केली. धक्कादायक बाब म्हणजे या अपघातानंतर खासदाराच्या मुलीला पोलीस ठाण्यातूनच जामीन मंजूर करण्यात आला. या हायप्रोफाईल प्रकरणाची आता दोन दिवसांनी देशपातळीवर चर्चा सुरु झाली आहे. 

चेन्नईतील बेसंट नगरमध्ये हा अपघात घडला. वायएसआर काँग्रेसचे राज्यसभा खासदार बिदा मस्तान राव यांची मुलगी माधुरी चौधरी ही आरोपी आहे. माधुरीने भरधाव बीएमडब्ल्यू कार फूटपाथवर झोपलेल्या २४ वर्षीय सूर्याच्या अंगावर घातली. यामध्ये सूर्याचा मृत्यू झाला. सूर्या हा पेंटर म्हणून काम करुन आपलं पोट भरत होता. आठ महिन्यांपूर्वीच त्याचे लग्न झाले होते. महत्त्वाची बाब म्हणजे माधुरी चौधरी अपघातावेळी मद्यधुंद अवस्थेत होती. अपघातानंतर तिच्या मैत्रिणीने तिथल्या लोकांशी हुज्जतही घातली. तिने लोकांना धमक्या दिल्याचाही आरोप करण्यात येत आहे. त्याचा व्हिडिओ सोशल मीडियावर व्हायरल होत आहे. बऱ्याच दबावानंतर पोलिसांनी आरोपी माधुरीला पकडले होते. मात्र पोलीस ठाण्यातच तिला जामीन देऊन घरी पाठवण्यात आले. 

सोमवारी रात्री हा अपघात झाला. माध्यमांच्या वृत्तानुसार, माधुरी अपघाताच्या वेळी दारूच्या नशेत होती आणि ती गाडी चालवत होती. कारमध्ये तिची एक मैत्रिणही होती. माधुरीने फूटपाथवर झोपलेल्या सूर्यावर कार चढवल्यानंतर तिथून पळ काढला. त्यानंतर तिच्या मैत्रिणीने गाडीतून खाली उतरत जमलेल्या लोकांशी वाद घातला. त्यानंतर काही वेळाने तीही निघून गेली. गर्दीतल्या काही लोकांनी सूर्याला रुग्णालयात दाखल केले मात्र त्याचा मृत्यू झाला होता. पोलिसांनी तपासानंतर खासदाराच्या मुलीला अटक केली होती मात्र तिची जामिनावर सुटका करण्यात आली होती. आरोपीची जामीनावर सुटका केल्यामुळे वायएसआर काँग्रेसचे राज्यसभा खासदार आणि स्थानिक पोलीस प्रशासनावर लोकांकडून जोरदार टीका केली जात आहे.

कोण आहेत बीडा मस्तान राव?

बीडा मस्तान राव हे आंध्र प्रदेशचे नेते आणि व्यापारी आहेत. निवडणूक प्रतिज्ञापत्रानुसार, त्यांच्याकडे १६५ कोटी रुपयांपेक्षा जास्त संपत्ती आहे. बीडा मस्तान यांची कंपनी बीएमआर ग्रुप सीफूड उद्योगातील एक प्रसिद्ध नाव आहे. बीडा मस्तान राव २००९ ते २०१९ पर्यंत टीडीपीमध्ये होते. या काळात ते आंध्र प्रदेशातील कावली मतदारसंघाचे आमदार होते. २०१९ मध्ये त्यांनी वायएसआरसीपीमध्ये प्रवेश केला. २०२२ मध्ये ते वायएसआरसीपीमधून खासदार झाले.