दिल्लीत आठवर्षांच्या चिमुकलीची हत्या केल्यानंतर बलात्कार

दिल्लीमध्ये एका नराधमाने आठवर्षाच्या मुलीची हत्या करुन नंतर तिच्यावर बलात्कार केल्याची धक्कादायक घटना समोर आली आहे.

ऑनलाइन लोकमत 

नवी दिल्ली, दि. २७ - दिल्लीमध्ये एका नराधमाने आठवर्षाच्या मुलीची हत्या करुन नंतर तिच्यावर बलात्कार केल्याची धक्कादायक घटना समोर आली आहे. दिल्लीच्या सीमेवरील बादली भागामध्ये शुक्रवारी रात्री या मुलीचा मृतदेह सापडला होता. चंदन भुकान (१९) असे आरोपीचे नाव आहे. 

 

त्याने गुरुवारी रात्री मुलीचे अपहरण करुन तिची हत्या केली नंतर तिच्या मृतदेहावर बलात्कार केला. पीडित मुलीच्या मृतदेहाजवळ एक चप्पल सापडली होती. त्यावरुन पोलिसांनी आरोपीला अटक केली. मुलगी गुरुवारी रात्री आठ वाजल्यापासून बेपत्ता होती. शवविच्छेदन अहवालानुसार मुलीची गळा आवळून हत्या केल्यानंतर तिच्यावर बलात्कार केला. 

 

या प्रकरणाच्या तपासासाठी पोलिसांचे विशेष पथक स्थापन करण्यात आले होते. त्यांना घटनास्थळावर महत्वाचे पुराव सापडले होते. त्याआधारावर त्यांनी तपास केला. घटनास्थळाजवळ वीट भट्टीचा एका कारखाना आहे. तेथे काम करणा-या ७० कामगारांची पोलिसांनी कसून चौकशी केली. चौकशी दरम्यान चंदन भुकान या वीटभट्टी मजूराने गुन्हयाची कबुली दिली. 

 

चंदननने पीडित मुलीच्या वडिलांना ओळखत असल्याची कबुली दिली. घटनेच्या रात्री भुकान आणि त्याचे दोन मित्र मनोज आणि नाथन मुलीच्या वडिलांसोबत मद्यपान करण्यासाठी त्यांच्या घरी गेले होते. पण मुलीचे आई-वडिल घरी नसल्याने ते माघारी परतले. त्यावेळी भुकानचे घराबाहेर कॉटवर झोपलेल्या मुलीवर लक्ष गेले आणि त्याने अपहरणाचा कट रचला. 

 

भुकान पुन्हा १० वाजता त्या मुलीच्या घरी गेला. त्याने मुलीला जबरदस्तीने घरामागे असलेल्या शेतात नेले तेथे त्याने बलात्काराचा प्रयत्न केला. जेव्हा मुलीने मदतीसाठी आरडाओरडा सुरु केला. तेव्हा त्याने मुलीची गळा आवळून हत्या केली. त्यानंतर त्याने मुलीवर बलात्कार केला व मृतदेह तिथेच टाकून पळून गेला. चंदन भुकान विरोधात हत्येच्या ३०२ कलम आणि बलात्काराच्या ३७६ कलमाखाली गुन्हा दाखल करण्यात आला आहे.