केवळ 45000 लोकांना मिळणार प्रजासत्ताक दिनाची परेड पाहण्याची संधी

Republic Day Parade : अलीकडच्या काळात कोरोनाच्या संसर्गाची चिंता वाढली होती, परंतु सरकारने त्यावर कोणतेही कठोर नियम लागू केले नाहीत.

नवी दिल्ली : प्रजासत्ताक दिनाच्या सोहळ्यात मोठे बदल करण्यात आले आहेत. या विशेष प्रसंगी केंद्राने पाहुण्यांची संख्या कमी करण्याचा निर्णय घेतला आहे. आता केवळ 45000 प्रेक्षक प्रजासत्ताक दिनाच्या सोहळ्याला पोहोचू शकतील, जिथे पूर्वी दरवर्षी एक लाख 25 हजार प्रेक्षकांना कर्तव्य पथावर आमंत्रित केले जात होते. केवळ कोरोनाच्या काळात 25 हजार प्रेक्षक कर्त्यव पथावर पोहोचू शकले. अलीकडच्या काळात कोरोनाच्या संसर्गाची चिंता वाढली होती, परंतु सरकारने त्यावर कोणतेही कठोर नियम लागू केले नाहीत.

दरम्यान, 32,000 तिकिटे ऑनलाइन विक्रीसाठी उपलब्ध असतील आणि 12,000 ई-निमंत्रण कार्ड जारी केले जातील. मात्र, काही फिजिकल तिकिटे देखील लोकांना दिली जातील. यावेळी व्हीव्हीआयपी निमंत्रण पत्रिकांची संख्या कमी करण्यात आली आहे. पूर्वी ते 50,000-60,000 पेक्षा जास्त असायचे ते आता 12,000 पर्यंत कमी झाले आहे. सर्वसामान्यांच्या संख्येत कोणतीही घट नाही.

इजिप्तचे राष्ट्रपती सोहळ्याचे प्रमुख पाहुणे
इजिप्तचे राष्ट्रपती अब्देल फताह एल सिसी हे यंदाच्या प्रजासत्ताक दिनाच्या सोहळ्याचे प्रमुख पाहुणे आहेत. इजिप्तची 120 सदस्यांची तुकडी पहिल्यांदाच कर्तव्य पथावर कूच करणार आहे. बीटिंग द रिट्रीट समारंभासाठी एकूण जागांपैकी 10 टक्के जागा सामान्य लोकांसाठी राखीव ठेवण्यात आल्या आहेत, ज्यांची संख्या 1,250 आहे. यावर्षी 16 राज्ये आणि सहा केंद्रीय मंत्रालयांची झलक दाखवण्यात येणार आहे. यावेळच्या प्रजासत्ताक दिनाच्या सोहळ्याची थीम जन भागिदारीचा विषय आहे, म्हणजे अधिकाधिक लोकांचा सहभाग आणि त्यानुसार सर्व काही आयोजित करण्यात आले आहे.

सेंट्रल व्हिस्टाच्या कामगारांवर विशेष लक्ष
सेंट्रल व्हिस्टा प्रकल्पातील कामगार आणि त्यांचे कुटुंबीय, कर्तव्य पथचे मेंटेनन्स कामगार, दूध बूथ विक्रेते, भाजी विक्रेते आणि छोटे किराणा विक्रेते या कार्यक्रमाला विशेष निमंत्रित असतील. त्यांना उजवीकडे पुढच्या रांगेत बसवले जाईल. याचबरोबर, प्रजासत्ताक दिनाच्या परेडसाठी वैध तिकीट किंवा निमंत्रण पत्रिका असलेल्या प्रेक्षकांना मेट्रो स्टेशनपासून परेडच्या ठिकाणी सहज जाण्याची व्यवस्था सरकार करेल. तसेच, या वेळी 23 जानेवारीपासून स्वातंत्र्य सैनिक सुभाषचंद्र बोस यांच्या वाढदिवसानिमित्त लष्करी टॅटू आणि आदिवासी नृत्यांसह या उत्सवाची सुरुवात होईल. दिल्लीतील जवाहरलाल नेहरू स्टेडियमवर दोन दिवस हे आयोजन होणार आहे.

प्रजासत्ताक दिनानिमित्त विविध कार्यक्रम
मिलिटरी टॅटू आणि ट्रायबल डान्समध्ये हॉर्स शो, खुकरी डान्स, गडका, मल्लखांब, कलारीपयट्टू, थंगाटा, मोटरसायकल डिस्प्ले, एअर वॉरियर ड्रिल टीम, नेव्ही बँड, पॅन मोटर आणि हॉट एअर बलून असे कार्यक्रम होणार आहेत. देशभरातून एकूण 20 प्रकारचे आदिवासी समूह येतील, जे कार्यक्रमादरम्यान "आदि शौर्य" चे प्रतिनिधित्व करणारे आदिवासी नृत्य सादर करतील. यासोबतच बॉलिवूड गायक कैलाश खेर देखील प्रेक्षकांचे मनोरंजन करणार आहेत. परेड पाहण्यासाठी 19 देशांतील 198 परदेशी कॅडेट्सना आमंत्रित करण्यात आले आहे. यामध्ये 32 अधिकारी आणि 166 कॅडेट्सचा समावेश आहे जे 27 जानेवारी रोजी पंतप्रधानांच्या NCC रॅलीमध्ये सहभागी होणार आहेत.

परेड दरम्यान मेक-इन-इंडियाचा जलवा
आत्मनिर्भर भारत उपक्रमावर लक्ष केंद्रित करून, मेक-इन-इंडियाची काही उत्पादने परेड दरम्यान प्रदर्शित केली जातील. यामध्ये मेन बॅटल टँक, एनएजी मिसाइल सिस्टीम, के 9 वज्र, ब्रह्मोस, आकाश मिसाईल, अँडव्हान्स लाइट हेलिकॉप्टर यांचा समावेश आहे. गतवर्षीप्रमाणेच बीटिंग द रिट्रीट सोहळ्यादरम्यान ड्रोन शोचे आयोजन करण्यात येणार आहे.