सलमान म्हणतो काळवीटाचा मृत्यू नैसर्गिक

जोधपूर, दि. 27 - काळवीटाची शिकार केल्याचा आरोप असलेल्या सलमान खानने आज कोर्टामध्ये ते काळवीट नैसर्गिकरीत्या मेल्याचा युक्तिवाद केला आहे. डॉ. नेपालिया या डॉक्टरांनी सगळ्यात आधी दिलेला अहवाल, ज्यात काळवीट नैसर्गिकरीत्या मरण पावल्याचे म्हटले आहे, तो खरा असून बाकीचा सगळा पुरावा खोटा असल्याचा दावा सलमानने केला आहे.

जोधपूरमध्ये सुरू असलेल्या या खटल्यामध्ये न्यायाधीशांनी 60 प्रश्न विचारले, ज्यापैकी बहुतेक प्रश्नांना सलमानने गलत असे उत्तर दिले आहे. काळवीटाची हत्या केल्याच्या आरोपावरून त्याच्यावर खटला सुरू आहे.

तुला काळवीटावर गोळी चालवताना दोघा प्रत्यक्षदर्शींनी बघितल्याचा दावा केल्याचे न्यायाधीश दलपत सिंह राजपुरोहीत यांनी सांगितले. त्यावर सलमानने गलत असा प्रतिवाद केला. जीपमध्ये रक्ताचे डाग तसेच काळवीटाचे केस आढळल्याचे न्यायाधीशांनी म्हटल्यावर त्यावरही सलमानने गलत असे उत्तर दिले. तसेच, रात्रीच्यावेळी तू गोळी चालवल्याचे सांगितल्यावर त्यावरही त्याने खोटे असल्याचा प्रतिवाद केला. कोर्टाने सैफ अली खानचा जबाबही घेतला आहे. 

1998 मध्ये 1 ऑक्टोबरच्या रात्री हम साथ साथ हैच्या शुटिंगच्या दरम्यान सहकलाकारांसह रात्रीच्या वेळी काळवीटाची शिकार केल्याचा सलमानवर आरोप आहे. बेकायदेशीररीत्या शस्त्रे बाळगल्याच्या आरोपातून नुकतीच त्याची मुक्तता करण्यात आली आहे.

 

आणखी वाचा