सलमानचे प्रयत्न अपुरे, मलायका-अरबाज खान होणार वेगळे?
By लोकमत न्यूज नेटवर्क | Published: March 13, 2016 06:54 AM2016-03-13T06:54:44+5:302016-03-13T11:39:42+5:30
गेल्या काही दिवसांपासून अरबाज खान आणि 'छैंया छैंया' गर्ल मलायका अरोरा यांच्या घटस्फोटासंदर्भात सुरू असणारी चर्चा अखेर खरी ठरण्याची शक्यता आहे
सलमानचे प्रयत्न अपुरे, मलायका-अरबाज खान होणार वेगळे?
Next
मुंबई, दि. १३ - गेल्या काही दिवसांपासून अरबाज खान आणि 'छैंया छैंया' गर्ल मलायका अरोरा यांच्या घटस्फोटासंदर्भात सुरू असणारी चर्चा अखेर खरी ठरण्याची शक्यता आहे. इंडिया टुडेच्या वृत्तानुसार, मलायका लवकरच मोठे पाऊल उचलण्याची शक्यता आहे. गेल्या काही दिवसांत सलमान खानने अरबाज आणि मलायकामधील दुरावा कमी करण्याचा खूप प्रयत्न केला. मात्र, त्याचे प्रयत्न अपुरेच ठरले असल्याचे समजते आहे. मलायकाचा घटस्फोटाचा निर्णय अंतिम असल्याचे सूत्रांचे म्हणणे आहे.
मागील तीन महिन्यांपासून मलायका अरबाजपासून वेगळी राहत आहे. ती खारमधील भाड्याच्या घरात मुलगा अरहानसोबत राहत आहे. त्याच अपार्टमेंटमध्ये मलायकाची बहीण अमृता राहते; मात्र मलायका तिच्याकडे राहत नाही. अमृताने वाढदिवसानिमित्त दुबईत दिलेल्या पार्टीलाही मलायका गेली नव्हती. या पार्टीला अरबाज उपस्थित होता. नणंद अर्पिताच्या डोहाळे जेवणालाही मलायका गैरहजर राहिली होती.
५ वर्ष एकमेंकाच्या प्रेमात अखंड बुडाल्यानंतर १२ डिसेंबर १९९८ रोजी मलायका व अरबाज लग्नाच्या बंधनात अडकले होते. १८ वर्षांमध्ये त्या दोघांमध्ये खटके उडाल्याचे ऐकिवात नव्हते. अलीकडे ते दोघे पॉवर कपल या रिऍलिटी शोचे सूत्रसंचालन करत होते; मात्र जेमतेम तीन भागच ते एकत्र होते. शोसाठी येताना दोघेही वेगवेगळ्या गाडीतून येत असत. त्या वेळी या दोघांमध्ये खटके उडाल्याची चर्चा होती.
दरम्यान, अरबाजला ती परत येईल अशी अपेक्षा होती पण तसे घडताना दिसत नाही. सलीम खान आणि सलमा खान यांनीही दोघात तडजोड करण्याचा प्रयत्न केल्याचे समजते पण त्यांचा सल्लाही मलायकाने मानलेला नाही. त्यामुळे लवकरच त्यांच्या घटस्फोटाची अधिकृत बातमी वाचायला मिळू शकते.
