सेहवाग भारताचा नाही तर BCCI चा प्रतिनिधी - उमर खालिद

नवी दिल्ली, दि. 1 - दिल्ली युनिव्हर्सिटीच्या रामजस कॉलेजमधील वादामध्ये विद्यार्थिनी गुरमेहर कौरच्या समर्थनार्थ मैदानात उतरणा-यांमध्ये जावेद अख्तर आणि नसीरुद्दीन शाह यांच्यानंतर आता जेएनयूचा विद्यार्थी नेता उमर खालिदचं नाव जोडलं गेलं आहे. क्रिकेटर विरेंद्र सेहवागच्या ट्विटवर आक्षेप घेत उमर खालिद बोलला आहे की, 'विरेंद्र सेहवाग भारतीय क्रिकेट नियामक मंडळाचं (बीसीसीआय) प्रतिनिधित्व करतो, भारताचं नाही'.

 

(दिल्ली युनिव्हर्सिटीच्या वादात सेहवागची उडी, केलं धमाकेदार ट्विट) 

 

गुरमेहर कौरच्या समर्थनार्थ उमर खालिदने फेसबूक पोस्ट शेअर केली आहे. उमर खालिदने लिहिलं आहे की, 'विरेंद्र सेहवाग बीसीसीआयसाठी खेळतो, तो भारताचं प्रतिनिधित्व करत नाही. मंगळवारी दिल्ली युनिव्हर्सिटीत जमा झालेले हजारो विद्यार्थी आणि शिक्षक आंदोलनासाठी रस्त्यावर उतरले, ते भारताचं प्रतिनिधित्व करतात. ते एका नव्या भारताचं प्रतिनिधित्व करता जो समानता, न्याय आणि स्वातंत्र्यावर आधारित आहे'.

 

एकीकडे अभिनेता रणदीप हुडा याने सेहवागचं समर्थन केलं तर दुसरीकडे जावेद अख्तर आणि नसीरुद्दीन शाह यांनी मात्र याचा विरोध केला. कुस्तीपटू योगेश्वर दत्त, बबिता फोगटदेखील या ट्विटर वॉरमध्ये सहभागी झाले आणि गुरमेहरच्या विरोधात उभे राहिले. जावेद अख्तर यांनी कुस्तीपटूंना कमी शिकलेले म्हणत टोला मारल्यानंतर हा वाद आणखीनच वाढला. यानंतर योगेश्वरसहित गीता फोगट आणि तिचे वडिल महावीर फोगट, बहिण रितू फोगट यांनी ट्विट करत उत्तर दिलं. दिग्दर्शक मधुर भंडारकर यांनीदेखील शिक्षणाचा अभिव्यक्ती स्वातंत्र्याशी काही देणं घेणं नाही असं मत व्यक्त करत जावेद अख्तर यांना सुनावलं. रात्र होईपर्यंत अनुपम खेर यांच्यासहित अनेक बॉलिवूड सेलिब्रेटी या ट्विटर वॉरमध्ये सहभागी झाले होते.

 

 

गेल्या बुधवारी डीयूमध्ये उमर खालीद आणि शहला रशीद यांना बोलावले होते. त्यातून अभाविप व एआयएसए यांच्यात वाद होऊन विद्यापीठात राडा झाला होता. निरपराध विद्यार्थ्यांना मारहाण, तसेच विद्यार्थिनींना बलात्काराची धमकी देण्याचे प्रकार घडले होते. यामुळे संतप्त गुरमेहरने सोशल मीडियावर ‘मी अभाविपला घाबरत नाही’ ही मोहीम सुरू केली.

 

 

 गुरमेहर कौरने सोशल मीडियावर मोहीम सुरु केल्यानंतर तिला बलात्काराची धमकी देण्यात आली होती, ज्यानंतर दिल्ली विद्यापीठातील (डीयू) वाद चिघळला होता. भाजपा नेत्यांनी गुरमेहरला लक्ष्य केल्यानंतर विरोधी नेते तिच्या बचावासाठी धावले आहेत, तर केंद्रीय गृहराज्यमंत्री किरेण रिजिजू यांनी गुरमेहरचे मन कोणी प्रदूषित केले, असा सवाल केला, तर काही भाजपा नेत्यांनी या तरुणीपेक्षा दाऊद इब्राहिम बरा, या पातळीवर जात टीका केली.

 

रामजस कॉलेजमध्ये झालेल्या हिंसेवर गुरमेहर कौरचा एक फोटो सोशल मीडियावर व्हायरल झाला. या फोटोमध्ये गुरमेहरच्या हातात असलेल्या एका पोस्टरवर ''माझ्या वडिलांना पाकिस्तानने नाही तर युद्धाने मारलं'' असं लिहीलेलं होतं. गुरमेहरचे वडिल कारगिल युद्धात शहीद झाले होते. यानंतर गुरमोहर चर्चेत आली होती. यानंतर सेहवागने गुरमोहरच्या या ट्विटला उत्तर दिलं होतं. 'मी दोन वेळेस त्रिशतक झळकावलं नाही तर माझ्या बॅटने त्रिशतक झळकावलं', असं खिल्ली उडवणारं ट्विट सेहवागने केलं.

 

अर्थमंत्री अरुण जेटलींनी केलेल्या टिप्पणीबद्दल काँग्रेस नेते पी. चिदंबरम यांनी त्यांच्यावर जोरदार टीका केली. डीयूत शिकत असलेली गुरमेहर कारगिल युद्धात शहीद झालेले कॅप्टन मंदीपसिंग यांची मुलगी आहे. दरम्यान, गुरमेहरने तक्रार दिल्यास संबंधितांवर कारवाई करण्यात येईल, असे दिल्ली पोलिसांनी सांगितले.

 

 गुरमेहरच्या मोहिमेला प्रचंड प्रतिसाद मिळाल्यानंतर, भाजपा नेत्यांनी तिला लक्ष्य करण्याचा प्रयत्न केला. अभाविपच्या कार्यकर्त्यांनी बलात्काराच्या धमक्या दिल्याची तक्रार गुरमेहरने सोमवारी दिल्ली महिला आयोगाकडे केली. त्यानंतर, आयोगाने गुरमेहरला पोलीस संरक्षण देण्याच्या सूचना दिल्लीच्या पोलीस आयुक्तांना दिल्या. गुरमेहरने तिच्या तक्रारीत पुरावे म्हणून बलात्काराच्या धमकीचे स्क्रीनशॉट दिले आहेत.

 

या सर्व वादानंतर गुरमेहरने देशभक्ती आंदोलनात सहभागी न होण्याचा निर्णय घेतला. अखिल भारतीय विद्यार्थी परिषदेच्या मोर्चात आपण सहभागी होत नसल्याचं गुरमेहर कौरने ट्विट करुन सांगितलं. 'मी मोहिमेतून माघार घेत आहे. सर्वांचं अभिनंदन. मला एकटीला सोडावं अशी विनंती करते. मला जे बोलायचं होतं, ते मी बोलले आहे', असं ट्विट गुलमेहरने केलं. यावेळी तिने इतर विद्यार्थ्यांना मोठ्या प्रमाणात आंदोलनात सहभागी होण्याचं आवाहनही केलं. 

 

गुरमेहरने गेल्या आठवड्यात फेसबुकवर, ‘मी दिल्ली विद्यापीठाची एक विद्यार्थिनी आहे. मला अभाविपची भीती वाटत नाही. भारताचा प्रत्येक विद्यार्थी माझ्यासोबत आहे,’ हा मेसेज टाकताच, वर्गमित्र आणि इतर विद्यार्थ्यांनी तिची पोस्ट शेअर केली, पण माजी क्रिकेटपटू वीरेंद्र सेहवाग आणि बॉलीवूड अभिनेता रणदीप हुडा आदींनी तिची ‘राजकीय प्यादे’ अशी संभावना केली. सेहवागने तर तिची टिंगलच केली.

 त्यावर ती म्हणाली, ‘त्यांनी माझी देशभक्तीची कल्पना समजलेली नाही. शिवाय ही राजकीय चळवळ नाही. हा मुद्दा विद्यार्थ्यांशी आणि आमचा परिसर हिंसक धमक्यांपासून मुक्त करण्याशी संबंधित आहे. कोणीही कोणाला बलात्काराची धमकी देऊ शकत नाही.’

 

भाजपाचे खासदार प्रताप सिन्हा यांनी, ‘गुरमेहरपेक्षा अंडरवर्ल्ड डॉन दाऊद इब्राहिम बरा,’ या भाषेत तिच्यावर टीका केली.

 

भाजपा नेत्यांनी कारगिल शहिदाच्या मुलीविरुद्ध वादग्रस्त प्रतिक्रिया दिल्याबद्दल काँग्रेसने भाजपावर जोरदार टीका केली. रिजिजू आणि सिन्हा यांची विधाने फॅसिस्ट मानसिकतेचे परिपूर्ण उदाहरण आहे. एखाद्या व्यक्तीचे विचार कदाचित तुम्हाला पटणार नाहीत. म्हणून मग धमक्या देणे योग्य नाही. हे प्रकार लोकशाहीत बसणारे नाहीत, अशी टीका काँग्रेसचे प्रवक्ते मनीष तिवारी यांनी केली.