देवरियातल्या भीषण रस्ते अपघातात सात जणांचा मृत्यू

उत्तर प्रदेशमधल्या देवरियातल्या खुखुंदू पोलीस ठाण्याच्या क्षेत्रात काल रात्री एक भीषण अपघात झाला आहे.

लखनऊः उत्तर प्रदेशमधल्या देवरियातल्या खुखुंदू पोलीस ठाण्याच्या क्षेत्रात काल रात्री एक भीषण अपघात झाला आहे. या अपघातात सात जणांचा मृत्यू झाला आहे. तर एक व्यक्ती गंभीररीत्या जखमी आहे. खुखुंदू पोलीस ठाण्याचे प्रमुख श्यामलाल यादव यांच्या माहितीनुसार, सोनूघाट-बरहज मार्गावर एका ट्रकनं कारला पाठीमागून धडक दिली. ज्यात 7 जणांचा जागीच मृत्यू झाला, तर एक जण गंभीररीत्या जखमी आहे. एका रुग्णाची रुग्णालयात जाऊन विचारपूस केल्यानंतर ते घरी परतत असताना हा अपघात झाला. त्याच दरम्यान एका ट्रकनं त्यांच्या कारला पाठीमागून धडक दिली. ज्यात कारमध्ये असलेले लोक मृत्युमुखी पडले.

आजूबाजूच्या लोकांनी याची माहिती पोलिसांना दिली. त्यानंतर पोलिसांनी त्यांना जिल्हा रुग्णालयात दाखल केलं. तिथे गेल्यानंतर ओमप्रकाश यादव व त्यांच्या पुतण्याला मृत घोषित करण्यात आलं. इतर चार जणांचा उपचारादरम्यान मृत्यू झाला. या अपघातातील जखमी असलेल्या रामवृक्ष यांच्यावर उपचार सुरू असून, त्यांची प्रकृती चिंताजनक आहे. मृतांमध्ये ओमप्रकाश यादव, राकेश यादव, संतोष सिंह, शशांक मणी, शीव नरेश, अनिल श्रीवास्तव यांचा समावेश आहे. सर्वच मृतदेह शवविच्छेदनासाठी पाठवण्यात आले आहेत.