'ती' कापलेले गुप्तांग घेऊन पोलिस स्थानकात आली

मध्यप्रदेशात एक ३२ वर्षीय महिला बलात्कार करणा-या दीराचे गुप्तांग कापून पुरावा म्हणून ते गुप्तांग पोलिस स्थानकात घेऊन गेल्याची धक्कादायक घटना गुरुवारी घडली.

ऑनलाइन लोकमत 

भोपाळ, दि. ११ - मध्यप्रदेशात एक ३२ वर्षीय महिला बलात्कार करणा-या दीराचे गुप्तांग कापून पुरावा म्हणून ते गुप्तांग पोलिस स्थानकात घेऊन गेल्याची धक्कादायक घटना गुरुवारी घडली. बलात्कार करणा-या दीराला रोखण्याचा हाच एकमेव मार्ग होता असा दावा या महिलेने केला. 

पोलिस घटनास्थळी वैद्यकीय मदत घेऊन पोहोचण्याआधीच त्या इसमाने आत्महत्या केली. गुरुवारी संध्याकाळी सहाच्या सुमारास सिद्धी जिल्हयातील चुराहट भागात ही घटना घडली. महिला कापलेले गुप्तांग घेऊन तीन मुलांसह पोलिस स्थानकात येताच तिथे एकच गोंधळ उडाला. 

या महिलेचा पती नाशिकमध्ये नोकरीला आहे. ही महिला तिची मुले आणि दीरासह इथे रहात होती. या महिलेचा दीर तिच्यावर गेल्या काही दिवसांपासून बलात्कार करत होता असे पोलिसांनी सांगितले. नेहमीप्रमाणे दीराने आज माझ्यावर जबरदस्ती केली. तेव्हा मी त्याला माझी सहमती आहे असे दाखवले नंतर एकाक्षणी धारदार शस्त्राने त्याचे गुप्तांग कापले असे या महिलेने पोलिसांना सांगितले. 

या महिलेच्या दीराने घराजवळ असलेल्या झाडाजवळ गळफास घेऊन आत्महत्या केली. या महिलेवर हत्येचा गुन्हा दाखल झाला असून, पोलिस या प्रकरणाचा तपास करत आहेत.