आंघोळ करताना पाहिले म्हणून 'तिने' केली आत्महत्या

तरुणाने आंघोळ करताना पाहिले म्हणून तरुणीने स्वत:ला जाळून घेत आत्महत्येचा प्रयत्न केला. राजस्थानच्या भिलवाडा जिल्ह्यातील देलाना गावात ही धक्कादायक घटना घडली.

ऑनलाइन लोकमत 

जयपूर, दि. २२ - तरुणाने आंघोळ करताना पाहिले म्हणून तरुणीने स्वत:ला जाळून घेत आत्महत्येचा प्रयत्न केला. राजस्थानच्या भिलवाडा जिल्ह्यातील देलाना गावात ही धक्कादायक घटना घडली. मुलीला उदयपूर येथील रुग्णालयात दाखल करण्यात आले असून ती ७० टक्के भाजली आहे. आरोपीच्या वडिलांना आणि नातेवाईकांना पोलिसांनी या प्रकरणी अटक केली आहे. बुधवारी संध्याकाळी ही घटना घडली. 

 

सदर पिडित मुलगी घराजवळ बांधलेल्या झोपडयामध्ये आंघोळ करत होती. त्यावेळी १८ वर्षाचा मुलगा आता डोकावून पाहत होता. हा प्रकार लक्षात येताच ती मुलगी किंचाळली. या मुलीच्या ओरडण्याने तिचे काका बाहेर आले व त्यांनी आरोपी मुलाला पकडले. त्यांनी मुलाला चांगलेच फैलावर घेतले. 

 

त्यानंतर काही वेळाचे आरोपी मुलाचे वडील किशनलाल वैष्णव (४५) आणि भवन दास (३०) पिडित मुलीच्या घरी गेले व तिच्या कुटुंबियांबरोबर वाद घातला. ही वादावादी सुरु असतान ही मुलगी तिथेच होती. या सर्व वादाला आपणच जबाबदार आहोत या भावनेतून तिने स्वत:ला जाळून घेऊन आत्महत्येचा प्रयत्न केला. 

 

मुलाच्या कृत्यामुळे झालेल्या वादातून आपण आत्महत्येचे पाऊल उचलले असे मुलीने पोलिसांना दिलेल्या जबानीत सांगितले. पोलिसांनी किशनलाल आणि भवन दासला अटक केली आहे. आरोपी मुलगा फरार आहे.