शिवसेनेच्या कार्यकर्त्यांनी पाक कलाकारांचा कार्यक्रम उधळला

गुडगाव महापालिकेने एका खुल्या नाट्यगृहात आयोजित केलेला पाकिस्तानच्या नाटक मंडळींचा नाटकाचा प्रयोग शिवसेनेने उधळून लावला

गुडगाव : गुडगाव महापालिकेने एका खुल्या नाट्यगृहात आयोजित केलेला पाकिस्तानच्या नाटक मंडळींचा नाटकाचा प्रयोग शिवसेनेने उधळून लावला. संबंधित नाटकाच्या प्रयोगात चार पाकिस्तानी कलाकारांचा समावेश असल्याची माहिती मिळताच शिवसैनिक कार्यक्रमस्थळी पोहोचले आणि त्यांनी या ठिकाणी धिंगाणा घातला. दरम्यान, रविवारी या प्रकरणी चार शिवसैनिकांना अटक करण्यात आली.
भारत-पाक उभय देशांतील संबंध अधिक दृढ व्हावेत, या उद्देशाने शनिवारी रात्री मास ग्रुप फाऊंडेशन ही पाकिस्तानमधील नाटक मंडळी ‘बान्झ’ नावाचे नाटक सादर करीत होती. याचदरम्यान स्वत:ला शिवसैनिक सांगणारे सुमारे पाच ते सहा जण नाट्यमंचावर चढले आणि त्यांनी जोरदार गोंधळ घातला. पाकिस्तानविरोधी नारेबाजी करीत त्यांनी नाट्यप्रयोग बंद पाडला. या प्रकरणी गुडगाव महापालिकेने दिलेल्या तक्रारीवरून चौघांना अटक करण्यात आली आहे. अजय, गौतम, सुमित आणि जितू, अशी त्यांची नावे आहेत. आम्ही सुरक्षेसाठी पोलिसांना सूचना दिली होती. मात्र, पोलीस घटनास्थळी आले आणि लगेच निघून गेले. यानंतर शिवसैनिकांनी गोंधळ घालत आमचा कार्यक्रम उधळून लावला, असा आरोप कार्यक्रमाच्या आयोजकांनी केला आहे. यापूर्वी शिवसेनेने पाकिस्तानी गझल गायक गुलाम अली यांचा मुंबई व पुण्यातील नियोजित कार्यक्रम रद्द करण्यास आयोजकांना भाग पाडले होते. पाकचे माजी परराष्ट्रमंत्री खुर्शीद कसुरी यांच्या पुस्तक प्रकाशन सोहळ्यावेळी भाजपचे माजी सदस्य सुधींद्र कुळकर्णी यांच्यावर शाईहल्ला केला होता.