हृदयद्रावक! सांबारच्या पातेल्यात पडून २ वर्षीय चिमुकलीचा मृत्यू; वाढदिवसालाच दुर्दैवी घटना

मोठा आवाज झाल्याने सर्वजण धावत गेलेल्या सर्वांना स्वयंपाकघरातील दृष्य पाहून मोठा धक्काच बसला.

अमरावती: आंध्र प्रदेशमध्ये एका दुर्दैवी घटनेत २ वर्षीय चिमुकलीचा करुण अंत झाल्याची घटना घडली आहे. पाहुण्यांना बोलावून चिमुकलीचा वाढदिवस साजरा केला जात होता. मात्र, पाहुण्यांसाठी तयार करत असलेल्या सांबारच्या गरम पातेल्यात पडून या चिमुरडीचा मृत्यू झाल्याची धक्कादायक घटना घडल्याची माहिती देण्यात आली आहे. कृष्णा जिल्ह्यामधील कलागरा गावामध्ये रविवारी हा अपघात घडला. 

पोलिसांनी दिलेल्या माहितीनुसार मृत्यू झालेल्या मुलीचे नाव तेजस्वी असे आहे. या अपघातानंतर मुलीला उपचारासाठी जवळच्या रुग्णालयामध्ये दाखल करण्यात आले होते. मात्र फार जास्त भाजल्याने उपचारादरम्यान या मुलीचा मृत्यू झाला. पोलिसांनी या प्रकरणामध्ये अपघाती मृत्यूची नोंद केली असून, या प्रकरणाचा तपास सुरु आहे.

नेमके काय घडले?

शिवा आणि भानूमत यांची दोन वर्षांची मुलगी तिच्या वाढदिवसाच्या दिवशी घरासमोरच्या अंगणामध्ये खेळत होती. मात्र, वाढदिवसानिमित्त घरी आलेल्या पाहुण्यांच्या भोजनाची व्यवस्था पाहण्यात आई-वडील व्यस्त होते. यातच तेजस्वी खेळता खेळता स्वयंपाक घरात गेली. ती खुर्चीवर चढून खेळत असताना तोल जाऊन समोर असलेल्या गरम सांबारच्या पातेल्यात पडली. मोठा आवाज झाल्याने सर्वजण स्वयंपाकघरात धावत गेले. तेव्हा समोरचे दृष्य पाहून सर्वांनाच मोठा धक्का बसला. तेजस्वीला तातडीने तिरुवुरु येथील रुग्णालयात दाखल करण्यात आले. डॉक्टरांच्या सल्ल्यानुसार, पुढील चांगल्या उपचारांसाठी दुसऱ्या रुग्णालयात हलवण्यात आले. मात्र, सोमवारी उपचारादरम्यान तिचा मृत्यू झाला.