भारत-ऑस्ट्रेलिया मॅचवेळी भयंकर घटना; जन्मदात्या बापाने आवळला मुलाचा गळा, धक्कादायक कारण समोर

भारत विरुद्ध ऑस्ट्रेलिया हा अंतिम सामना सुरू असताना एक धक्कादायक घटना घडली आहे. मुलाने टीव्ही बंद केल्याच्या रागातून जन्मदात्या वडिलांनी टोकाचे पाऊल उचलले.

ऑस्ट्रेलियाला पराभूत करत तिसऱ्यांदा वर्ल्ड कप जिंकण्याचं भारतीय संघाचं स्वप्न रविवारी अहमदाबादच्या नरेंद्र मोदी स्टेडियमवर धुळीस मिळालं. ऑस्ट्रेलियाने ६ विकेट्स राखून भारतावर दणदणीत विजय मिळवला. संपूर्ण स्पर्धेत दमदार कामगिरी करणाऱ्या टीम इंडियाचा अखेरच्या सामन्यात पराभव झाल्याने संपूर्ण देश हळहळला. मात्र याच क्रिकेट सामन्यादरम्यान उत्तर प्रदेशातील कानपूर येथे एक धक्कादायक घटना घडली आहे. भारत विरुद्ध ऑस्ट्रेलिया हा सामना बघत असताना मुलाने टीव्ही बंद केल्याच्या रागातून जन्मदात्या बापानेच त्याचा गळा आवळून खून केल्याचं पोलीस तपासात उघड झालं आहे.

रविवारी देशभरातील क्रिकेट चाहते भारतीय संघाच्या विजयाची प्रार्थना करत टीव्हीसमोर बसले होते. कानपूर येथील गणेश प्रसाद हेदेखील क्रिकेटप्रेमी असल्याने टीव्हीसमोर बसून सामन्याचा आनंद घेत होते. मात्र त्यांचा मुलगा दीपक याने अचानक टीव्ही बंद केला. वर्ल्ड कपचा अंतिम सामना रंगात आलेला असतानाच मुलाने टीव्ही बंद केल्यामुळे संतापलेल्या वडिलांनी चक्क वायरच्या साहाय्याने गळा आवळून दीपकचा खून केला. याप्रकरणी आरोपी गणेश प्रसाद याला पोलिसांनी अटक केली आहे.

नेमकं काय घडलं?

कानपुरातील चकेरी येथे एका तरुणाचा खून करण्यात आल्याची माहिती अज्ञान व्यक्तीने फोनद्वारे पोलिसांना दिली. त्यानंतर पोलिसांनी घटनास्थळी दाखल होत तपासास सुरू केली. रविवारी रात्रीपासून दीपकचे वडील गणेश प्रसाद फरार असल्याचे पोलिसांना समजले. गणेश प्रसाद याला दारूचं व्यसन होतं आणि त्यामुळे पिता-पुत्रामध्ये सतत वाद होत असल्याची माहिती नातेवाईकांनी पोलिसांना दिली होती. त्यामुळे या वादातूनच गणेशने मुलाचा खून केल्याचा प्राथमिक अंदाज व्यक्त केला जात होता. 

दरम्यान, पोलिसांनी फरार असलेल्या गणेशचा शोध घेऊन त्याला ताब्यात घेतलं. मात्र व्यसनाच्या वादातून नव्हे तर वर्ल्ड कप फायनल सुरू असताना टीव्ही बंद केल्याचा राग आल्यानेच मी मुलाचा खून केल्याची कबुली गणेश प्रसाद याने दिली आहे.