गस्ती वाहनावर दहशतवादी हल्ला; तीन दहशतवाद्यांचा खात्मा; एक जवान शहीद

गस्तीवरील जवानांच्या वाहनावर दहशतवाद्यांनी हल्ला केला.

जम्मू : दहशतवाद्यांनी जम्मू-श्रीनगर हायवेवर भारतीय सैन्याच्या गस्ती वाहनावर हल्ला केला. या हल्ल्यात जवान वाचले तरीही नंतरच्या चकमकीमध्ये एक जवान शहीद झाला असून तीन दहशतवाद्यांना ठार करण्यात आले आहे. तर दोन जवान जखमी झाले आहेत. 

गस्तीवरील जवानांच्या वाहनावर दहशतवाद्यांनी हल्ला केला. यावेळी जवानांनी प्रत्यूत्तर देताच दहशतवाद्यांनी जवळच असलेल्या घराचा आसरा घेतला. तसेच घरातील व्यक्तींना बंधक बनविले. बंधक व्यक्तींना सुखरूप बाहेर काढण्यात आले असून तीन दहशतवाद्यांना ठार करण्यात आले. चकमकीमध्ये एक जवान शहीद झाला आहे. तर दोन पोलिस जवान जखमी झाले. 

पोलिस महासंचालक मुकेश सिंह यांनी सांगितले की, घरात तीन दहशतवादी लपलेले होते. त्या सर्वांना ठार करण्यात आले. विजय कुमार असे घराच्या मालकाचे नाव होते. त्यांच्या वडिलांना बंधक बनविण्यात आले होते. त्यांनाही सुरक्षित बाहेर काढण्यात आले आहे. या कारवाई दरम्यान, सीआरपीएफचा जवान शहीद झाला. तर दोघे जखमी झाले. त्यांच्यावर उपचार सुरू आहेत. तसेच परिसरात हाय अलर्ट जारी करण्यात आला आहे. 

हल्ल्यानंतर हे दहशतवादी हायवेनजीकच्या जंगलात लपलेले होते. तेथूनच ते गोळीबार करत होते. यानंतर ते जवळच्या वस्तीवरील घरामध्ये घुसले, असे त्यांनी सांगितले.