'द काश्मीर फाइल्स'चा शो बंद पडल्याने मॉलमध्ये प्रेक्षकांनी घातला गोंधळ; पोलिसांनी सांगितले 'हे' कारण

'The Kashmir Files' show stopped : गोंधळाची माहिती मिळताच दाखल झालेल्या सेक्टर-39 कोतवाली पोलिसांनी प्रेक्षकांना शांत केले आणि चित्रपट पुन्हा सुरू केला.

नोएडा: नोएडाच्या सेक्टर-38 ए मध्ये असलेल्या जीआयपी मॉलच्या थिएटरमध्ये मंगळवारी रात्री उशिरा 'द काश्मीर फाइल्स' चित्रपट अचानक बंद पडल्याने गोंधळ झाला. मॉलमध्ये चित्रपटाचा शेवटचा शो सुरू होता. चित्रपटगृह व्यवस्थापकाने मुद्दाम चित्रपट थांबवल्याचा आरोप प्रेक्षकांनी केला आहे. 

गोंधळाची माहिती मिळताच दाखल झालेल्या सेक्टर-39 कोतवाली पोलिसांनी प्रेक्षकांना शांत केले आणि चित्रपट पुन्हा सुरू केला. त्याचवेळी पोलिस अधिकाऱ्यांचे म्हणणे आहे की, एसीमध्ये बिघाड झाल्याने मध्यंतरी काही काळ चित्रपट थांबवण्यात आला. यामागे दुसरे कोणतेही कारण समोर आलेले नाही. काश्मीर फाइल्स चित्रपट काश्मीरमध्ये 1990 च्या दशकात काश्मिरी पंडितांवर झालेल्या अत्याचार (kashmiri pandit exodus) आणि रातोरात काश्मीर सोडण्याची वेदनादायक घटना वर्णन करतो.

मंगळवारी रात्री उशिरा जीआयपी मॉलच्या थिएटरमध्ये काश्मीर फाइल्स चित्रपट सुरू होता. मध्येच चित्रपट थांबल्यानंतर प्रेक्षकांनी गोंधळ घालण्यास सुरुवात केली. हा चित्रपट जाणूनबुजून बंद करण्यात आल्याचा आरोप प्रेक्षकांनी केला आहे. यानंतर गदारोळ सुरू झाला. चित्रपट थांबल्यानंतर उपस्थित प्रेक्षकांनी भारत माता की जयचा जयघोष सुरू केला. ज्याचा एक व्हिडिओ वेगाने व्हायरल होत आहे. या व्हिडिओमध्ये गोंगाटात भारत माता की जयच्या घोषणाही ऐकू येत आहेत. या गोंधळाची माहिती मिळताच कोतवाली पोलिसांसह वरिष्ठ अधिकारीही घटनास्थळी पोहोचले. पोलिसांनी लोकांना समज देऊन शांत केले.

एसीमध्ये बिघाड झाला
एडीसीपी रणविजय सिंह यांनी सांगितले की, एसीमध्ये बिघाड झाल्याने चित्रपट मध्यभागी थांबवण्यात आला. दुरुस्तीनंतर, चित्रपट पुन्हा सुरू करण्यात आला. या चित्रपटाबाबत लोकांमध्ये खूप भावनिक संबंध आहे, त्यामुळेच प्रेक्षकांना हा व्यत्यय सहन झाला नाही आणि त्यांनी आरडाओरडा करण्यास सुरुवात केली. आतापर्यंत कोणाकडूनही तक्रार आलेली नाही. तक्रार आल्यानंतर चौकशी केली जाईल.