राम मंदिरातील पुजाऱ्यांचं वेतन ठरलं, थेट खात्यात जमा होणार पैसे! अँड्रॉइड फोनचीही परवानगी, पण...

...आता जुलैअखेर निश्चित पगार त्याच्या खात्यात हस्तांतरित केला जाईल.

श्रीराम जन्मभूमीमध्ये रामललांची अष्टयाम सेवा आणि पूजेसाठी नवनियुक्त 20 पुरोहितांचे वेतन निश्चित करण्यात आले आहे. हे वेतन जाहीर केले नसले तरी, यासंदर्भात पुजाऱ्यांना माहिती देण्यात आली आहे. याशिवाय तीर्थक्षेत्रातील कायमस्वरूपी पुजाऱ्यांना अनुज्ञेय सुविधा उपलब्ध करून देण्यासंदर्भातही विश्वस्त मंडळाने माहिती दिली आहे. या पुजाऱ्यांना प्रशिक्षण कालावधीत दरमहा दोन हजार रुपये मानधन दिले जात होते. आता जुलैअखेर निश्चित पगार त्याच्या खात्यात हस्तांतरित केला जाईल.

यापूर्वी राम मंदिरचे मुख्य पुचारी आचार्य सत्येन्द्र दास शास्त्री यांच्याशिवाय, अशोक उपाध्याय, संतोष कुमार तिवारी, प्रदीप दास आणि प्रेम कुमार तिवारी हे चार सहायक पुजारी, तसेच कोठारी आणि भंडारी तथा एका सहायकाच्या वेतनात ऑक्टोबर 2023 मध्ये वाढ करण्यात आली होती. याशिवाय विविध प्रकारच्या सुविधांचीही घोषणा करण्यात आली होती. या सुविधा नव्या पुजाऱ्यांनाही देण्यात येतील.

सध्या, प्रशिक्षण कालावधी पूर्ण झाल्यानंतर नवनियुक्त पुजाऱ्यांसाठी तीर्थक्षेत्र कार्यालयाशिवाय स्वतंत्र निवासाची व्यवस्था करावी लागणार आहे. कारण दुसऱ्या बॅचचे प्रशिक्षण सुरू झाल्यावर संबंधित बॅचच्या प्रशिक्षणार्थींची व्यवस्था तेथे केली जाईल.

अँड्राइड फोनला परवानगी, पण... -
श्री रामजन्मभूमी तीर्थक्षेत्र ट्रस्टने, पुजाऱ्यांनी मंदिरात अँड्रॉईड फोन वापरण्यावर घातलेली बंदी मागे घेतली आहे. यामुळे आता पुजारी मंदिराच्या आवारात अँड्रॉईड फोन घेऊन जाऊ शकतील. मात्र, त्यांना गर्भगृहात मोबाईल फोन वापरता येणार नाही. गर्भगृहात प्रवेश करण्यापूर्वी पुजारी मोबाईल लॉकरमध्ये जमा करतील. गरज भासल्यास मंदिराबाहेर ते मोबाईलवर बोलू शकतील.

याशिवाय व्हीआयपी अथवा भाविकांना वेळेनुसार टिका-चंदन लावण्यावर कुठल्याही प्रकारचे बंधन नसेल. पण, कुठलाही पुजारी भाविकांनी दिलेल्या देणगीची रक्कम स्वीकारणार नाही. तो ती रक्कम दानपेटीत टाकण्याचे निर्देश देईल, असेही पुजाऱ्यांच्या बैठकीत सांगण्यात आले आहे.