योगी आदित्यनाथांचा ‘जबरा फॅन’, मुस्लीम तरूणानं छातीवर गोंदवला मुख्यमंत्र्यांचा टॅटू

Yogi Adityanath News : योगी आदित्यनाथ यांचा हा फॅन अतिशय निराळा आहे. त्यानं आपल्या छातीवर त्यांचा टॅटू गोंदवला आहे.

अनेकदा तुम्ही आपल्या कुटुंबातील एखाद्या व्यक्तीचं किंवा बॉलिवूडच्या कलाकाराचं, एखाद्या सेलिब्रिटीचं नाव कोणी ना कोणी गोंदवलेलं पाहिलंच असेल. परंतु एखाद्या राजकारणी व्यक्तीला किंवा मुख्यमंत्र्यांच्या प्रती मनात इतकं प्रेम की त्यांच्या वाढदिवसाच्या दिवशी त्यांना गिफ्ट देण्यासाठी आपल्या शरीरावर त्यांचा टॅटू गोंदवून घेतला असेल, असं जर तुम्हाला कळालं तर? उत्तर प्रदेशचे मुख्यमंत्री योगी आदित्यनाथ यांचा असाच एक जबरी फॅन आहे.

या व्यक्तीचं नाव यामीन सिद्दीकी असं आहे. २३ वर्षीय यामीन योगी आदित्यनाथ यांना आपला आदर्श मानतो. जनपद फर्रूखाबाद आणि मैनपुरीच्या सीमेवर असलेल्या एका गावात त्यांचं घर आहे. तसंच या ठिकाणी त्यांचा फुटवेअरचा व्यवसायही आहे.

योगी आदित्यनाथ यांचं सरकार आल्यानंतर त्यांची कार्यशैली आणि त्यांनी योजनांमुळे यामीन सुरूवातीपासून प्रभवित झाला होता. तसंच त्यांच्याप्रती प्रेम आणि आदर दिवसागणिक वाढतही गेला. इतकंच काय तर योगी आदित्यनाथांना वाढदिवसाचं गिफ्ट म्हणून त्यानं आपल्या छातीवर त्यांचा टॅटूही गोंदवून घेतला. त्याची अद्याप योगी आदित्यनाथ यांच्याशी भेट झाली नाही. परंतु भविष्यात त्यांची भेट घेऊन त्यांना हा टॅटू दाखवण्याची त्याची इच्छा आहे. याची माहिती त्याच्या काही मित्रांना मिळाल्यावर त्यांनी यावर टीका केली. परंतु यामीननं याकडे लक्ष दिलं नाही. दरम्यान, योगी आदित्यनाथ यांचं सरकार उत्तर प्रदेशात आल्यापासून इकडचं चित्र बदलल्याचंही तो म्हणतो. या ठिकाणी कोणावरही भेदभाव केला जात नाही, हिंदू असो किंवा मुस्लीम सर्वांना योजनेचा समान लाभ मिळत असल्याचंही तो म्हणतो.