माजी मंत्र्यांच्या मोटारीवर चढले वाघोबा!

वरुडचा थरार : दहा मिनिटे दिला ठिय्या

व�

��ुडचा थरार : दहा मिनिटे दिला ठिय्या
अशोक पिंपरे
राळेगाव (यवतमाळ) : स्थळ - वरुड रस्त्यावरील जंगल. वेळ रात्री आठची. पट्टेदार वाघ अचानक वाहनापुढे उभा. चालकाने प्रसंगावधान राखून काचा वर घेतल्या. धिप्पाड वाघ दोनदा वाहनावर चढला. दहा मिनिटे ठिय्या देऊन मग जंगलात मार्गस्थ झाला. माजी मंत्री आणि विधानसभेचे माजी उपाध्यक्ष प्रा. वसंतराव पुरके यांनी मंगळवारी हा थरार अनुभवला. यामुळे या परिसरात पट्टेदार वाघाचा संचार असण्यावर शिक्कामोर्तब झाले आहे.
प्रा. पुरके मोहदा येथून राळेगावकडे येत होते. वरुडलगतच्या जंगलातून रस्त्यावर अचानक पट्टेदार वाघ आला. हा धिप्पाड वाघ पाहून वाहन चालकाची पाचावर धारण बसली. मात्र प्रसंगावधान राखून त्याने वाहन थांबवित तत्काळ काचा वर केल्या. वाहनात प्रा. पुरके आणि त्यांचे पाच कार्यकर्ते होते. एक-दोन मिनिटात वाघ निघून जाईल, असा त्यांचा अंदाज होता. मात्र या वाघाने तब्बल दहा मिनिटे तेथेच तळ ठोकला. तो दोनदा वाहनावर चढला. एकदा तर प्रा. पुरके बसलेल्या खिडकीजवळ जाऊन काचेतून पाहू लागला. जीव मुठीत घेऊन सर्वजण मोटारीत शांतपणे बसून राहिले. दहा मिनिटानंतर हा वाघ रस्त्याच्या कडेने चालत जंगलात निघून गेला आणि सर्वांचा जीव भांड्यात पडला.
या भागात वाघाच्या हल्ल्याच्या घटना घडत आहेत. दोघांना जीव गमवावा लागला. आज माझ्या वाहनापुढे वाघ आला. आपणही वाघाचे भक्ष झालो असतो. त्यामुळे वाघ पकडण्याची मोहीमेला गती द्या, अशी सूचना पुरके यांनी वन खात्याला दिल्या आहेत.
.................
बॉक्स
असाही योगायोग
प्रा.वसंतराव पुरके खैरगाव कासार येथे वाघाच्या हल्ल्यात ठार झालेल्या व्यक्तीच्या कुटुंबीयांचे सांत्वन करण्यासाठी गेले होते. परतीच्या प्रवासात असताना वरुड जवळ त्याच पट्टेदार वाघाचे दर्शन झाले. हा विलक्षण योगायोग पुरके यांना अनुभवावा लागला.