सुखी संसाराचं स्वप्न अधूरं राहिलं! लग्नानंतर काही मिनिटांत नववधू विधवा, नवरदेवाला आला हार्ट अटॅक

नव्या नवरीच्या स्वागताची जोरदार तयारी सुरू असताना एक भयंकर घटना घडली आणि क्षणात हसतं खेळतं घर उद्ध्वस्त झालं आहे.

नवी दिल्ली - घरात लग्नाची, नव्या नवरीच्या स्वागताची जोरदार तयारी सुरू असताना एक भयंकर घटना घडली आणि क्षणात हसतं खेळतं घर उद्ध्वस्त झालं आहे. एका जोडप्याचं सुखी संसाराचं स्वप्न अधूरं राहिलं आहे. लग्नानंतर अवघ्या काही मिनिटांतच नववधू विधवा झाल्याची हृदयद्रावक घटना समोर आली आहे. लग्न मंडपात नवरदेवाचा हार्ट अटॅकने मृत्यू झाला. लग्न करून नववधूला घरी घेऊन आलेल्या तरुणाला अचानक चक्कर आली. नातेवाईकांनी तातडीने त्याला रुग्णालयामध्ये दाखल केलं. मात्र डॉक्टरांनी त्याला मृत घोषित केल्याने हसतं खेळतं घर क्षणात उद्ध्वस्त झालं आहे. 

हसतं-खेळतं घर उद्ध्वस्त झालं! 

मिळालेल्या माहितीनुसार, बिहारच्या चंपारण जिल्ह्यातील बेतिया भागात राहणाऱ्या चंदेश्वर गिरी यांच्या मुलगा मनीष गिरी याचं अमेठिया गावातील चंदा नावाच्या तरुणीसोबत लग्न ठरलं होतं. लग्नाच्या आधीच्या रात्री मनिषला चक्कर आली होती. मात्र लग्नाच्या दगदगीमुळे त्याला चक्कर आली असावी, असं सर्वांना वाटलं होतं. त्यावेळी काही मिनिटांची विश्रांती घेऊन तो पुन्हा कामाला लागला होता. त्यानंतर लग्नसोहळा थाटामाटात संपन्न झाला. अनेक लोकांची लग्नाला उपस्थिती होती.

मंडपात नवरदेवाचा हार्ट अटॅकने मृत्यू

मध्यरात्री सुमारे तीन वाजण्याच्या सुमाराला लग्नाचे सर्व विधी पार पडले आणि त्यानंतर मनीष नववधूला घेऊन आपल्या घरी आला होता. घरी आल्यानंतर काही वेळातच त्याला पुन्हा एकदा चक्कर आली. त्याला अस्वस्थ वाटू लागलं. त्या अवस्थेत त्याच्या नातेवाईकांनी मनीषला रुग्णालयामध्ये दाखल केलं. डॉक्टर मनीषला डिस्चार्ज देतील, अशी नातेवाईकांची अपेक्षा होती. मात्र डॉक्टरांनी मनिषचा मृत्यू झाल्याचं सांगितलं आणि नववधूच्या पायाखालची जमीनच सरकली. मनीषला हार्ट अटॅक आल्यामुळे त्याचा मृत्यू झाला. त्यामुळे काही मिनिटांआधी नववधू म्हणून घरात आलेली चंदा विधवा झाली आहे. एका हिंदी वेबसाईटने याबाबतचे वृत्त दिले आहे.