परमबीर सिंग आहेत कुठे? सर्वोच्च न्यायालयाचा सवाल; अटकेपासून दिलासा देण्यास स्पष्ट नकार

परमबीर सिंग यांना अटकेपासून दिलासा देण्यास सर्वोच्च न्यायालयाचा नकार; वकिलांची कानउघाडणी

नवी दिल्ली: मुंबईचे माजी पोलीस आयुक्त परमबीर सिंग यांना दिलासा देण्यास सर्वोच्च न्यायालयानं स्पष्ट शब्दांत नकार दिला आहे. सिंग यांनी त्यांच्या वकिलांच्या माध्यमातून अटकेपासून संरक्षण देणारी याचिका केली आहे. त्यावरील सुनावणी दरम्यान न्यायमूर्तींनी सिंग यांच्या वकिलांना सुनावलं. परमबीर सिंग कुठे आहेत, त्यांचा ठावठिकाणा काय, याची माहिती न्यायालयाला द्या, असे आदेश न्यायमूर्तींनी दिले.

Supreme Court asks absconding former Mumbai police commissioner Param Bir Singh to disclose his whereabouts and says that it will hear Singh's plea for protection against arrest only after he tells which part of the country or the world he is in. pic.twitter.com/LXNVfN3d7G

— ANI (@ANI) November 18, 2021

परमबीर सिंग यांच्यावर खंडणीचे चार गुन्हे दाखल आहेत. त्यांनी देशाबाहेर पळ काढल्याचं बोललं जात आहे. त्यावरून सर्वोच्च न्यायालयानं सिंग यांच्या वकिलांची झाडाझडती घेतली. 'याचिकाकर्ते जगाच्या कोणत्या कोपऱ्यात आहेत? ते या देशात आहेत की देशाबाहेर गेलेत? याचिकाकर्ते कुठे आहेत ते आम्हाला सर्वप्रथम जाणून घ्यायचं आहे,' असं न्यायमूर्ती एस. के. कौल म्हणाले.

Supreme Court asks the lawyer of Param Bir Singh to inform his whereabouts. Court posts the matter for hearing on Monday, 22nd November.

— ANI (@ANI) November 18, 2021

सिंग यांना सुरक्षित वाटल्यास ते समोर येतील, असा युक्तिवाद सिंग यांच्या वकिलांनी केला. त्यावरून न्यायमूर्तींनी वकिलांची कानउघाडणी केली. 'तुमचा व्यवस्थेवर किती अविश्वास आहे ते पाहा. याचिकाकर्ते पोलीस आयुक्त होते. पण आम्ही त्यांना कोणतीही विशेष वागणूक देणार नाही. ते संरक्षण मागत आहेत. न्यायालयानं अटकेपासून संरक्षण दिल्यावरच ते भारतात प्रकट होतील, असं तुम्हाला म्हणायचं आहे का?', असा सवाल न्यायमूर्ती कौल यांनी उपस्थित केला. या प्रकरणाची पुढील सुनावणी २२ नोव्हेंबरला होणार आहे.

Read in English