भारताला गोभक्त पंतप्रधान आणि हिंदूंपासून मुक्त करणार - झाकीर मुसा

भारताला गोभक्त पंतप्रधान नरेंद्र मोदी आणि हिंदूपासून मुक्त करणार असल्याची धमकी झाकीर मुसाने दिली आहे. बकरी-ईदच्या आधी झाकीर मुसाने 10 मिनिटांचा ऑडिओ मेसेज जारी करत ही धमकी दिली आहे.

नवी दिल्ली, दि. 1 - दहशतवादी संघटना हिजबूल मुजाहिद्दीनचा माजी कमांडर आणि अल-कायदाचा दहशतवादी असलेला झाकीर मुसाने पुन्हा एकदा भारताला धमकी दिली आहे. भारताला गोभक्त पंतप्रधान नरेंद्र मोदी आणि हिंदूपासून मुक्त करणार असल्याची धमकी झाकीर मुसाने दिली आहे. बकरी-ईदच्या आधी झाकीर मुसाने 10 मिनिटांचा ऑडिओ मेसेज जारी करत ही धमकी दिली आहे.

झाकीर मुसा धमकी देताना बोलला आहे की, 'गोभक्त नरेंद्र मोदी राजकारण आणि डिप्लोमसी करत लोक जमा करु शकतात, मात्र ते आम्हाला थांबवू शकत नाहीत. आम्ही भारतात इस्लामचा झेंडा फडकावल्याशिवाय राहणार नाही'. 

यावेळी झाकीर मुसाने रोहिंग्या मुस्लिमांना निर्वासित करण्यावरुन केंद्र सरकारला चेतावणी दिली आहे. गेल्या आठवड्यात केंद्र सरकारने देशातील जवळपास 40 हजार रोहिंग्या मुस्लिमांना निर्वासित करण्याची योजना आखत असल्याचं सांगितलं होतं. यामधील सहा हजार मुस्लिम जम्मूत राहतात. 

झाकीर मुसाने आपला धमकीचा हा मेसेज युट्यूब चॅनेल 'अन्सर गजवा'वर रिलीज केला आहे. त्याच्या समर्थकांनी हा ऑडिओ मेसेज सोशल मीडियावर शेअर करण्यास सुरुवात केली आहे. याआधी झाकीर मुसाची दहशतवादी संघटना असलेल्या 'अन्सर-गजावत-उल-हिंद'च्या मीडिया सेलने एक पोस्टर जारी करत लवकरच अल्ला आपली इच्छा पुरी करणार असल्याचं लिहिलं होतं. श्रीनगर पोलिसांनी पोस्टरसंबंधी चिंता व्यक्त करत ही झाकीर मुसाची दहशतवादी हल्ल्याची धमकी असल्याचं सांगितलं होतं. 

आपल्या या ऑडिओ रेकॉर्डिंगमध्ये झाकीर मुसा पाकिस्तानविरोधातही बोलला आहे. 'काश्मीरच्या स्वातंत्र्यासाठी लढणा-या तरुणांचा पाकिस्तानी लष्कर आणि सरकारने विश्वासघात केला आहे. अमेरिकेला साथ देत, त्याच्या फूस लावण्यावरुन पाकिस्तानने दहशतवाद्यांचे अनेक ट्रेनिंग कॅम्प बंद केले आहेत. इतकंच नाही तर काश्मीरमधील अनेक मुजाहिद्दीन त्यांच्या ताब्यात आहेत', असं झाकीर मुसा बोलला आहे. 

काश्मीरचा लढा आपल्या इतर सहका-यांसाठी प्रेरणास्त्रोत असल्याचंही झाकीर मुसाने सांगितलं आहे. तसंच काश्मीरच्या स्वातंत्र्यासाठी सुरु असलेल्या लढाईत आपल्याला कोणाच्याही मदतीची गरज नाही असं सांगत झाकीर मुसाने पाकिस्तानला सुनावलं आहे.