विद्यार्थिनीला आमदारासोबत सेक्स करण्यास भाग पाडणा-या महिलेस अटक

बिहारशरीफ, दि. २६ - एका शाळकरी मुलीला आमदारासोबत सेक्स करण्यास भाग पाडणा-या महिलेला नालंदा पोलिसांनी गुरूवारी अटक केली. ६ फेब्रुवारी रोजी घडलेल्या या प्रकरणी बिहार पोलिसांनी आरोपी महिला सुलेखा देवी हिच्यासह तिची आई राधादेवी, मुलगी छोटी कुमारी, लहान बहीण तुलसी देवी आणि मोतीराम नामक इसमालाही अटक केली. हिलसा पोलिस स्टेशनअंतर्गत येणा-या खड्डी गावातून या सर्वांना ताब्यात घेण्यात आले. सेक्स रॅकेट चालवण्यासाठी सुलेखा देवीचे कुटुंब तिला मदत करत असल्याचा संशय पोलिसांनी व्यक्त केला.

६ फेब्रुवारी रोजी सुलेखा देवी तिच्या शेजारी राहणा-या शाळकरी मुलीला वाढदिवसाच्या पार्टीच्या आमिषाने बाहेर घेऊन गेली आणि तिने त्या मुलीला राजद पक्षाचे आमदार राजवल्लभ यादव यांच्याकडे नेऊन त्यांची शय्यासोबत करण्यास भाग पाडले. मात्र या मुलीने धैर्य दाखवत घडल्या प्रकाराबद्दल पोलिसांत तक्रार दाखल केली. त्यानंतर पोलिसांनी तातडीने कारवाई करत सुलेखा देवीसह इतरांना अटक केली. या मुलीशी शारीरिक संबंध ठेवणारे राजवल्लभ यादव यांनाही लवकरच अटक करण्यात येईल असे पोलिसांनी सांगितले. दरम्यान राजद पक्षाने वल्लभ यांची पक्षातन हकालपट्टी केली असून बिहारचे मुख्यमंत्री नीतिश कुमार यांनीही आरोपी आमदार पळून पळून किती लांब जातील असा सवाल विचारत लवकरच त्यांच्या मुसक्या बांधण्यात येतील असा विश्वास व्यक्त केला.