रेल्वे ट्रॅकवर आढळला महिला हॉकी संघातील स्टार खेळाडूचा मृतदेह

भविष्यात महिला हॉकी संघातील स्टार खेळाडू म्हणून उदयास येऊ पाहणा-या खेळाडू ज्योती गुप्ता हिचा मृतदेह आढळल्याने खळबळ उडाली आहे

ठळक मुद्देज्योती गुप्ता हिचा मृतदेह आढळल्याने खळबळ उडाली आहे20 वर्षीय ज्योती गुप्ताने भारतीय महिला राष्ट्रीय हॉकी संघाचं नेतृत्व केलं होतंहरियाणामधील रेवारी येथे बुधवारी संध्याकाळी रेल्वे ट्रॅकवर तिचा मृतदेह आढळला

गुरुग्राम, दि. 4 - भविष्यात महिला हॉकी संघातील स्टार खेळाडू म्हणून उदयास येऊ पाहणा-या खेळाडू ज्योती गुप्ता हिचा मृतदेह आढळल्याने खळबळ उडाली आहे. 20 वर्षीय ज्योती गुप्ताने भारतीय महिला राष्ट्रीय हॉकी संघाचं नेतृत्व केलं होतं. तिचा खेळ पाहता भविष्यात एक मोठी खेळाडू म्हणून ती नावारुपाला येईल अशी सर्वांनाच अपेक्षा होती. मात्र तिचा मृतदेह आढळल्याने सर्वांनाचा धक्का बसला आहे. हरियाणामधील रेवारी येथे बुधवारी संध्याकाळी रेल्वे ट्रॅकवर तिचा मृतदेह आढळला. 

चंदिगड - जयपूर इंटरसिटी एक्स्प्रेसच्या चालकाने दिलेल्या माहितीच्या आधारे ज्योती गुप्ताने आत्महत्या केली असल्याचं पोलिसांनी सांगितलं आहे. अचानक ट्रेनसमोर उडी मारली असल्याने ज्योती गुप्ता ट्रेनखाली आली असल्याचं चालकाने सांगितलं आहे. रेवारी स्थानकाजवळ रात्री 830 वाजता झज्जर रोड पुलावरुन जात असताना अचानक ज्योती गुप्ता ट्रेनसमोर आली. यानंतर चालकाने रेल्वे पोलिसांना फोन करुन घटनेची माहिती दिली. पोलिसांनी शोध घेतला असताना ज्योती गुप्ताचा मृतदेह आढळला. 'ज्योती गुप्ता ट्रेनसमोर आल्यानंतर चालकाने ब्रेक दाबण्याचा प्रयत्न केला, मात्र ती इतक्या जवळ होती की तोपर्यंत ट्रेन थांबणं शक्य नव्हतं', अशी माहिती रेल्वे पोलीस अधिकारी रणवीर सिंग यांनी दिली आहे.

सुत्रांनी दिलेल्या माहितीनुसार, ज्योतीने सर्वात शेवटचा फोन कॉल आपल्या सोनपतमधील घरी गेला होता. रात्री 7 वाजता फोन करुन बस खराब झाली असल्याने उशीर होईल असं तिने घरी कळवलं होतं. इतका उशीर होऊनही ज्योती घरी आली  नाही म्हणून रात्री 10.30 वाजता तिच्या आईने फोन केला असता रेल्वे पोलिसांनी त्यांच्याशी बातचीत करत मुलीचा मृत्यू झाल्याची माहिती दिली. 

स्ट्राईकर म्हणून खेळणा-या ज्योतीने हिमाचल प्रदेशातील शिलारु येथे जून महिन्यात पार पडलेल्या तीन महिन्यांच्या नॅशनल कोचिंग कॅम्पला हजेरी लावली होती. जोहान्सबर्ग येथे पार पडलेल्या वर्ल्ड हॉकी लीग सेमीफायनच्या तयारीसाठी तिने गेल्या महिन्यात कसून तयारी केली होती. ऑगस्ट महिन्यात होणा-या कॅम्पलाही ती हजेरी लावणार होती. बुधवारी सकाळी सोनपत इंडस्ट्रियल परिसरात असलेल्या कोचिंग अकॅडमीत ती गेली होती. त्यानंतर घरी परतली होती. आपल्या दहावी आणि बारावीच्या मार्कशीटवरील काही चुका दुरुस्त करायच्या असल्याच्या सांगत ती घराबाहेर पडली होती. मात्र त्यानंतर थेट तिच्या मृत्यूची बातमी आली.