यासीन मलिक प्रकरणाची सुनावणी पूर्ण, 3.30 वाजता येणार निर्णय; NIAने केली फाशीची मागणी

Yasin Malik Terror Funding: दिल्लीच्या पटियाला हाऊस कोर्टाने फुटीरतावादी नेता यासिन मलिकच्या शिक्षेच्या कालावधीवर आज सुनावणी पूर्ण केली असून, दुपारी 3.30 वाजता निकाल दिला जाणार आहे.

नवी दिल्ली: टेरर फंडिंग प्रकरणात दोषी ठरलेला फुटीरतावादी आणि नेता जम्मू-काश्मीर लिबरेशन फ्रंट (JKLF) प्रमुख यासिन मलिकला आज त्याच्या गुन्ह्यांची शिक्षा होऊ शकते. दिल्लीच्या पटियाला हाऊस कोर्टाने यासिन मलिकच्या शिक्षेच्या कालावधीवर आज सुनावणी पूर्ण केली. आता यासिन मलिकच्या शिक्षेवर न्यायालय दुपारी 3.30 वाजता निकाल देणार आहे. सुनावणीदरम्यान एनआयएने (NIA) यासिन मलिकला फाशी देण्याची मागणी केली आहे. 

तत्पूर्वी, यासीनला कडक बंदोबस्तात न्यायालयात हजर करण्यात आले. यासीन मलिकला गेल्या सुनावणीत न्यायालयाने दोषी ठरवले होते आणि यासिनने दहशतवादासाठी वित्तपुरवठा प्रकरणी सर्व आरोप स्वीकारले होते. यात बेकायदेशीर क्रियाकलाप प्रतिबंध कायदा (UAPA) अंतर्गत आरोपांचा समावेश आहे. 19 मे रोजी पटियाला हाऊस न्यायालयाचे विशेष न्यायाधीश प्रवीण सिंग यांनी मलिकला दोषी ठरवले होते आणि राष्ट्रीय तपास यंत्रणेला त्याच्या आर्थिक स्थितीचे आकलन करून त्याच्यावर किती दंड आकारला जाऊ शकतो हे ठरवण्यास सांगितले होते. इतकेच नाही तर न्यायालयाने यासीन मलिकला त्याच्या मालमत्तेबाबत प्रतिज्ञापत्र देण्यासही सांगितले होते. यासिन मलिकला जास्तीत जास्त शिक्षा म्हणून फाशीची, तर कमीत कमी शिक्षा म्हणून जन्मठेपेची शिक्षा होऊ शकते, असे सांगण्यात येत आहे.

यासीनने सर्व आरोप मान्य केले होते
जम्मू काश्मीर लिबरेशन फ्रंटचा प्रमुख मलिक यांने त्याच्यावर लावलेल्या आरोपांना विरोध केला नाही. आरोपांमध्ये UAPA ची कलम 16 (दहशतवादी कृत्ये), 17 (दहशतवादी कृत्यांसाठी निधी गोळा करणे), 18 (दहशतवादी कट रचणे) आणि 20 (दहशतवादी टोळी किंवा संघटनेचा सदस्य असणे), भारतीय दंड 120-बी(गुन्हेगारी कट) आणि 124-A (देशद्रोह) ही कलमे लावली आहेत. जम्मू-काश्मीर लिबरेशन फ्रंट ही UAPA अंतर्गत प्रतिबंधित दहशतवादी संघटना आहे.

यासीन व्यतिरिक्त कोण दोषी?
न्यायालयाने यापूर्वी फारुख अहमद दार उर्फ ​​बिट्टा कराटे, शाबीर शाह, मसरत आलम, मोहम्मद युसुफ शाह, आफताब अहमद शाह, अल्ताफ अहमद शाह, नईम खान, मोहम्मद अकबर खांडे, राजा मेहराजुद्दीन कलवाल, बशीर अहमद भट, जहूर अहमद शाह वताली, फरार अहमद शाह, फरार अहमद शाह यांना अटक केली होती. शब्बीर अहमद शाह, अब्दुल रशीद शेख आणि नवलकिशोर कपूर यांच्यासह काश्मिरी फुटीरतावादी नेत्यांवर औपचारिकपणे आरोप निश्चित करण्यात आले आहेत.