आप नेत्या सोनी सोरी यांच्यावर अॅसिड सारख्या रसायनाने हल्ला

सामाजिक कार्यकर्त्या आणि आम आदमी पक्षाच्या नेत्या सोनी सोरी यांच्या चेह-यावर तीन अज्ञात हल्लेखोरांनी अॅसिडसारखे रसायन फेकले.

ऑनलाइन लोकमत 

रायपूर, दि. २१ - छत्तीसगडच्या नक्षलप्रभावित दंतेवाडा जिल्ह्यामध्ये शनिवारी रात्री सामाजिक कार्यकर्त्या आणि आम आदमी पक्षाच्या नेत्या सोनी सोरी यांच्या चेह-यावर तीन अज्ञात हल्लेखोरांनी अॅसिडसारखे रसायन फेकले. गीदाम पोलिस स्थानकाच्या हद्दीत रात्री साडेदहाच्या सुमारास जावंगा गावाजवळ ही घटना घडली. 

सोरी त्यांच्या दोन सहका-यांसह दुचाकीवरुन जगदालपूरहून गीदामच्या दिशेने जात असताना ही घटना घडल्याची माहिती पोलिसांनी दिली.

सोरी यांनी दिलेल्या जबानीनुसार बस्तानार घाट सोडल्यानंतर दुचाकीवरुन चाललेल्या तीन युवकांनी त्यांना थांबवले. त्यांना दुचाकीवरुन उतरवले व लगेच एकाने त्यांच्या चेह-यावर अॅसिडसारखे रसायन फेकले आणि तिथून पोबारा केला. सोनी यांच्या सहका-यांनी त्यांना तात्काळ गीदाम येथील रुग्णालयात दाखल केले व या घटनेची पोलिसांना माहिती दिली.