Asian Games 2023 : ऑटो चालकाची मुलगी ॲन्सी सोजनचा पराक्रम; तगड्या खेळाडूंना टक्कर देत जिंकले पदक

Asian Games 2023 : आशियाई स्पर्धा २०२३ मध्ये ॲन्सी सोजन एडाप्पिल्ली ( SOJAN EDAPPILLY Ancy) ने विक्रमी कामगिरी केली. महिलांच्या लांब उडीत सर्वांना शैली सिंगकडून पदकाची अपेक्षा होती, परंतु केरळच्या ॲन्सीने कमाल करून दाखवली. तिने तिसऱ्या प्रयत्नात ६.५६ मीटर लांब उडी मारून थेट दुसऱ्या क्रमांकावर झेप घेतली. शैली एकीकडे संघर्ष करताना दिसली. गतविजेत्या चीनी खेळाडू शीकी झिआँगला भारताच्या युवा खेळाडू ॲन्सीने कडवी टक्कर दिली. ॲन्सीने पाचव्या प्रयत्नात ६.६३ मीटर लांब उडी मारून रौप्यपदक निश्चित करण्याच्या दिशेने पाऊल टाकले. झिआँग ६.७३ मीटरसह अव्वल स्थानावर राहिली. 

विराट कोहली फाऊंडेशनकडून खेळणाऱ्या केरळच्या थिस्सूर येथील ॲन्सी सोजन हिच्या नावावर २१वर्षांखालील राष्ट्रीय विक्रम आहे. खेलो इंडिया युवा स्पर्धेत तिने ६.३६ मीटर लांब उडी मारून हा विक्रम केला होता आणि त्यानंतर तिची आशियाई इंडोअर अजिंक्यपद स्पर्धेसाठी भारतीय संघात निवड झाली. खेलो इंडियात तिने १०० मी. २०० मी., लांब उंडी आणि ४ बाय १०० रिले असे चार सुवर्णपदक जिंकले आहेत. २० वर्षांखालील स्पर्धेतही तिने लांब उडी व १०० मीटर स्पर्धेत रौप्यपदक जिंकले. तिचे वडील ऑटो चालवतात आणि आई सुपरमार्केटमध्ये काम करते. 

अॅथलेटिक्समध्ये आज महिलांच्या ३००० मीटर स्टीपलचेस प्रकारात पारुल चौधरीने रौप्य आणि प्रिती लांबाने कांस्यपदक जिंकून भारताच्या पदकात भर घातली. पारूलने ९ मिनिटे २७.६३ सेकंदाची वैयक्तिक सर्वोत्तम वेळ आज नोंदवली, तर प्रिती ९ मिनिटे ४३.३२ सेकंदासह तिसरी आली. प्रितीनेही सर्वोत्तम वेळेची नोंद आज केली. 

 कबड्डी - २०१० व २०१४च्या सुवर्णपदक विजेत्या भारतीय महिला कबड्डी संघाला अ गटातील पहिल्याच लढतीत चायनीस तैपेईकडून बरोबरीवर समाधानी राहावे लागले. शेवटच्या ७ सेकंदात तैपेईने अखेरच्या चढाईत गुण घेत हा सामना ३४-३४ असा बरोबरीत सोडवला.

हॉकी - भारताच्या पुरुष संघाने अ गटातील शेवटच्या साखळी सामन्यात बांगलादेशला १२-० असे नमवले. हरमनप्रीत सिंग ( ३),  मनदीप सिंग ( ३), अभिषेक ( २), रोहिदास, उपाध्याय, गुरजंत सिंग आणि एन शर्मा यांनी प्रत्येकी १ गोल केला.

टेबल टेनिस - भारताच्या सुतिर्था व अहिका मुखर्जी या बहिणींनी आशियाई स्पर्धा २०२३ मध्ये भारताला ऐतिहासिक पदक जिंकून दिले. मुखर्जी बहिणींनी महिलांच्या टेबल टेनिस स्पर्धेतील दुहेरी विभागाचे कांस्यपदक पटकावले.