अझलन शाह चषक - न्यूझीलंडचा पराभव करत भारताने जिंकलं कांस्यपदक

अझलन शाह चषकात प्लेऑफ लढतीत भारतीय हॉकी संघाने न्यूझीलंडचा पराभव करत कांस्यपदक जिंकलं आहे

ऑनलाइन लोकमत

इपोह, दि. 6 - रुपिंदरपाल सिंगने पेनल्टी कॉर्नरवर नोंदवलेल्या दोन गोलच्या जोरावर भारताने शनिवारी न्यूझीलंडचा ४-० ने पराभव केला आणि २६ व्या सुल्तान अझलान शाह कप हॉकी स्पर्धेत कांस्यपदकाचा मान मिळवला. रुपिंदरने १७ व २७ व्या मिनिटाला ड्रॅग फ्लिकवर न्यूझीलंडचा गोलकिपर रिचर्ड जोयसेला गुंगारा देत गोल नोंदवले.

 

त्यानंतर एस.व्ही. सुनीलने ४८ व्या मिनिटाला या स्पर्धेतील वैयक्तिक पहिला गोल नोंदवला. त्याने मनदीप सिंगने दिलेल्या क्रॉसचा लाभ घेत चेंडूला गोलजाळ्याचा मार्ग दाखविला तर तलविंदर सिंगने अखेरच्या मिनिटाला भारतातर्फे चौथा गोल नोंदवला. 

 

त्याआधी, मलेशियाने प्ले ऑफमध्ये जपानचा ३-१ ने पराभव करीत स्पर्धेत पाचवे स्थान पटकावले. गेल्या वर्षी भारताने या स्पर्धेत रौप्यपदक पटाकवले होते तर ऑस्ट्रेलियाने सुवर्णपदकाचा मान मिळवला होता. 

 

भारताला शुक्रवारी साखळीतील अखेरच्या लढतीत मलेशियाविरुद्ध लौकिकाला साजेशी कामगिरी करता आली नव्हती, पण आज मात्र भारतीय संघाची कामगिरी उल्लेखनीय ठरली.

 

Spectacular moments from India"s victory over New Zealand to bag BRONZE at the @azlancup 2017 on 6th May.https://t.co/EwaeKtM61J#INDvNZLpic.twitter.com/tOcmtnUW7d

— Hockey India (@TheHockeyIndia) May 6, 2017

याआधी अंतिम फेरी गाठण्यासाठी भारताला मलेशियावर २ गोल फरकाने विजय मिळवणे आवश्यक होते. त्याआधी सकाळी ग्रेट ब्रिटनने न्यूझीलंडचा ३-२ गोलने पराभव केला; परंतु भारतीय संघ अपेक्षेनुसार कामगिरी करू शकला नाही आणि पराभूत झाला. 

 

भारताने दोन गोलफरकाने विजय मिळवला असता तर ब्रिटनला कांस्यपदकासाठी खेळावे लागले असते; परंतु मलेशियाने जबरदस्त कामगिरी करताना भारतीय संघाच्या अपेक्षेवर पाणी फेरले. आॅस्ट्रेलियाने ९ वेळा सुल्तान अझलन शाह चषक स्पर्धेचे विजेतेपद पटकावले आहे, तर ग्रेट ब्रिटन तब्बल २३ वर्षांनंतर अंतिम फेरीत खेळणार आहे. याआधी ब्रिटनने १९९४ मध्ये एकदा विजेतेपद पटकावले होते.

 

भारतीय स्ट्रायकर मलेशियाचा डिफेन्स भेदू शकले नाही, तर दुसरीकडे मलेशियाने भारतीय सर्कलमध्ये सुरुवातीलाच प्रतिहल्ला केला. मलेशियाला नवव्या मिनिटाला पेनल्टी कॉर्नर मिळाला; परंतु भारताच्या व्हिडिओ रेफरलमुळे हा निर्णय बदलला गेला.

पहिल्या क्वार्टरमधील सुमार कामगिरीनंतर भारताने दुसऱ्या क्वार्टरमध्ये तीन पेनल्टी कॉर्नर्स मिळवले; परंतु भारताचे गोल करण्याचे प्रयत्न मलेशियाचा गोलरक्षक सुब्रमण्यम कुमार याने हाणून पाडले. मलेशियाकडून ५0 व्या मिनिटाला विजयी गोल शाहरील साबान याने केला.

 

तत्पूर्वी, ब्रिटनने त्यांच्या अखेरच्या साखळी सामन्यात न्यूझीलंडवर ३-२ अशी मात केली. ब्रिटनकडून सॅम वाडने नवव्या मिनिटाला, फिल रोपरने ३९ व्या मिनिटाला आणि मार्क ग्लेनहोर्गने ४९ व्या मिनिटाला गोल केले. न्यूझीलंडकडून डोमेनिक न्यूमेनने ३0 व्या मिनिटाला, तर ५८ व्या मिनिटाला पेनल्टी कॉर्नरवर रसेलने गोल केला.