एअर इंडियाला धक्का देत भारत पेट्रोलियम विजयी

भारत पेट्रोलियम आणि शिवशक्ती यांनी आपआपल्या अंतिम सामन्यात दिमाखदार विजयाची नोंद करताना मुंबई महापौर चषक कबड्डी स्पर्धेत

मुंबई : भारत पेट्रोलियम आणि शिवशक्ती यांनी आपआपल्या अंतिम सामन्यात दिमाखदार विजयाची नोंद करताना मुंबई महापौर चषक कबड्डी स्पर्धेत अनुक्रमे पुरुष व महिला गटाचे विजेतेपद पटकावले.
मुंबई शहर कबड्डी असोसिएशनच्या वतीने आणि महाराष्ट्र कबड्डी असोसिएशनच्या मान्यतेने ना. म. जोशी मार्ग येथील श्रमिक जिमखाना येथे झालेल्या या स्पर्धेत पुरुष गटात भारत पेट्रोलियमने बलाढ्य एअर इंडियाला नमवण्याची कामगिरी केली.
सुरुवातीला चुरशीचा खेळ झाल्यानंतर जबरदस्त आक्रमण करताना भारत पेट्रोलियमने २९-१३ अशी एकतर्फी बाजी मारून सहजपणे विजेतेपद पटकावले. प्रो कबड्डी स्टार नितीन मदने याने जबरदस्त आक्रमण करताना दीपचंद व गिरीश इरनाक यांनी दिलेल्या मोलाच्या साथीच्या जोरावर एअर इंडियाला पुनरागमनाची एकही संधी दिली नाही. उपविजेत्या एअर इंडियाकडून उमेश म्हात्रे याने एकाकी लढत दिली.
महिला गटात बलाढ्य शिवशक्तीने अपेक्षित विजेतेपद मिळवताना डॉ. शिरोडकरचा ४२-१२ असा फडशा पाडला. उपांत्य सामन्यात शिरोडकरने मुंबई पोलीस महिला संघाला नमवले असल्याने त्यांच्याकडे सर्वांचे लक्ष लागले होते. मात्र अंतिम सामन्यात पूर्णपणे वर्चस्व राखताना शिवशक्तीने आपला हिसका दाखवला.