केर्न्सने फिक्सिंगसाठी संपर्क केला होता : मॅक्युलम

क्रिस केर्न्सने स्पॉट फिक्सिंग करण्यासाठी आपल्याशी तीन वेळा संपर्क केला होता, असे धक्कादायक वक्तव्य न्यूझीलंडचाच कर्णधार ब्रॅण्डन मॅक्क्युलमने केले आहे.

वेलिंग्टन : क्रिस केर्न्सने स्पॉट फिक्सिंग करण्यासाठी आपल्याशी तीन वेळा संपर्क केला होता, असे धक्कादायक वक्तव्य न्यूझीलंडचाच कर्णधार ब्रॅण्डन मॅक्क्युलमने केले आहे. न्यायालयात पुराव्यासहित दाखल झालेला मॅक्क्युलम म्हणाला की, २००८ इंडियन प्रीमियर लीगच्या पहिल्या सत्रावेळी केर्न्सने कोलकाताच्या हॉटेलमध्ये आपल्याशी संपर्क साधला होता. नंतर त्याने फोनच्या माध्यमातून संपर्क केला. मी जेव्हा रिकी पॉण्टिंगबरोबर होतो त्या वेळी केर्न्सने बिझनेससंबंधी बोलायचे, असे म्हणाला. मी हॉटेलमध्ये त्याला भेटायला गेलो, तेव्हा केर्न्सने सट्टेबाजांशी भेट घडवून दिली. केर्न्सने प्रत्येक फिक्सिंगसाठी ७० हजार डॉलर ते एक लाख ८० हजार डॉलर रकमेचा प्रस्तावही ठेवला होता, असेही मॅक्क्युलमने सांगितले.
तीन वर्षे फिक्सिंगचा प्रस्ताव देऊनसुद्धा मी ही गोष्ट सार्वजनिक केली नाही. केर्न्सला मी अजून आपला मित्र मानतो. त्यामुळे ही गोष्ट सार्वजनिक करायला कठीण गेली. ही गोष्ट लपवून ठेवली तर काहीच फरक पडणार नाही, असे वाटत होते. मला केर्न्सची कधीच भीती वाटली नाही, असेही त्याने सांगितले. (वृत्तसंस्था)