कोलकात्यात रिमझिम पाऊस, भारत-पाक सामन्यात येणार व्यत्यय?
By admin | Published: March 19, 2016 11:11 AM2016-03-19T11:11:35+5:302016-03-19T12:18:36+5:30
कोलकात्यातील ईडन गार्डनवर आज संध्याकाळी होणा-या भारत-पाकिस्तान सामन्यासाठी उत्सुक असलेल्या क्रिकेट रसिकांचा पावसामुळे हिरमोड होण्याची शक्यता आहे.
कोलकात्यात रिमझिम पाऊस, भारत-पाक सामन्यात येणार व्यत्यय?
Next
कोलकाता, दि. १९ - कोलकात्यातील ईडन गार्डनवर आज संध्याकाळी होणा-या भारत-पाकिस्तान टी-२० सामन्यासाठी उत्सुक असलेल्या क्रिकेट रसिकांचा पावसामुळे हिरमोड होण्याची शक्यता आहे. कोलकात्यात पावसाच्या रिमझिम सरी कोसळत असून संध्याकाळपर्यंत हीच परिस्थिती कायम राहण्याची शक्यता आहे.
आज सकाळपासूनच कोलकात्यातील वातावरण ढगाळ झाले असून अधुनमधून पावसाच्या सरीही कोसळत आहेत. दिवसभर हीच परिस्थिती कायम राहू शकते वा वीजांच्या कडकडाटासाह आणखी मुसळधार पाऊस पडू शकतो, अशी शक्यता हवामान विभागातर्फे वर्तवण्यात येत आहे. तसे झाल्यास एकतर कमी षटकांचा सामना खेळवला जाईल वा तो रद्दही होऊ शकेल.
न्यूझीलंडकडून पहिल्या सामन्यात पराभवाचा शॉक बसलेला भारतीय संघ आज, शनिवारी टी-२० विश्वचषकाच्या दुसऱ्या सामन्यात कट्टर पारंपरिक प्रतिस्पर्धी पाकिस्तानविरुद्ध खेळणार आहे. सर्वाधिक चर्चित आणि बहुप्रतीक्षित अशा ‘हाय व्होल्टेज’ सामन्यात आयसीसी स्पर्धेत पाकविरुद्ध अजिंक्य राहण्याच्या विक्रमाची पुनरावृत्ती करण्यासह स्पर्धेतील आशा कायम राखण्याचेही भारतापुढे आव्हान असेल. मात्र पावसाच्या व्यत्ययामुळे हा सामनाच रद्द होतो की काय अशी भीती व्यक्त होत आहे.
भारताच्या विजयासाठी देशभरातील चाहत्यांची प्रार्थना
दरम्यान आजच्या सामन्यात भारताने आपला पारंपरिक प्रतिस्पर्धी असलेल्या पाकिस्तानला नमवावे यासाठी देशभरातील चाहते प्रार्थना करत आहेत. वाराणसी, लखनऊ, मुंबईत विविध ठिकाणी होम-हवन करून विजयासाठी प्रार्थना करण्यात आली. तर गोरखपूरमध्येही दर्ग्यात चादर चढवून भारताच्या विजयासाठी दुवा मागण्यात आली.
पुरी येथे शिल्पकार सुदर्शन पटनायक यांनी वाळूत शिल्प साकारून भारतीय संघाला आजच्या सामन्यासाठी शुभेच्छा दिल्या.![]()
कोईम्बतूरमध्ये चाहत्यांनी ६ फुटी उदबत्ती उभारून भारतीय संघाला शुभेच्छा देत विजयासाठी प्रार्थना केली.
