कॅरम: फहीम - निलम अध्यक्षीय चषक विजेते

फहिम काझीने  रिझर्व्ह बँकेच्या विश्व् विजेत्या प्रशांत मोरेला २५-४, १८-१५ असे सरळ दोन सेटमध्ये सहज पराभूत करून सर्वानाच आश्यर्याचा धक्का दिला.

मुंबई : मुंबई डिस्ट्रिक्ट कॅरम असोसिएशन व चित्तपावन ब्राह्मण संघ, मुंबई यांच्या संयुक्त विद्यमाने आयोजित केलेल्या ९ व्या अध्यक्षीय चषक मुंबई जिल्हा मानांकन कॅरम स्पर्धेत पुरुष एकेरी गटात अंतिम सामन्यात वरळी स्पोर्ट्स क्लबच्या फहिम काझीने  रिझर्व्ह बँकेच्या विश्व् विजेत्या प्रशांत मोरेला २५-४, १८-१५ असे सरळ दोन सेटमध्ये सहज पराभूत करून सर्वानाच आश्यर्याचा धक्का दिला व अध्यक्षीय चषकावर आपली नाव कोरले. तर दुसरीकडे महिला एकेरीच्या अंतिम सामन्यात जैन इरिगेशनच्या निलम घोडकेने आपल्या सहकारी मिताली पिंपळेवर १४-४, २३-२१ अशी मात करत बाजी मारली. 

पुरुष एकेरीच्या अंतिम फेरीत प्रवेश करण्यापूर्वी फहिमने जैन इरिगेशनच्या पंकज पवारला २५-१, १६-६ असे तर प्रशांतने एअर इंडियाच्या झैद अहमदला चुरशीच्या लढतीत २०-२३, २५-१४, २५-८ असे नमविले होते. दुसरीकडे महिलांमध्ये अंतिम फेरीत मजल मारताना निलमने रिझर्व्ह बँकेच्या उर्मिला शेंडगेवर २३-१३, १५-२५ व १२-१२ अशी तर मितालीने संगीता चांदोरकरवर २५-१५, १२-२३ व २५-१५ अशी मात केली होती. विजेत्या खेळाडूंना आंतर राष्ट्रीय कॅरमपटू झाहीर पाशाच्या हस्ते रोख पारितोषिके, प्रमाणपत्र व अध्यक्षीय चषक देऊन गौरविण्यात आले. याप्रसंगी चित्तपावन ब्राह्मण संघाचे खजिनदार प्रकाश गद्रे, मुंबई डिस्ट्रिक्ट कॅरम संघटनेचे सचिव यतिन ठाकूर, खजिनदार अरुण केदार उपस्थित होते.