Commonwealth Games 2018: मीराबाई चानूची 'सोनेरी' कामगिरी; विक्रमी कामगिरीसह सुवर्णपदकाची कमाई

४८ वजनी गटात मीराबाई चानूने सुवर्णपदक पटकावले आहे.

मीराबाई चानूने राष्ट्रकुल स्पर्धेत वेटलिफ्टिंग स्पर्धेत सुवर्णपदकाची कमाई केली आहे. ४८ वजनी गटात मीराबाई चानूने सुवर्णपदक पटकावले आहे. यंदाच्या राष्ट्रकुल स्पर्धेत भारताला मिळालेले हे पहिले सुवर्णपदक आहे. चानूने पहिल्या प्रयत्नात ८० किलो वजन उचलले. यानंतर तिने ८४ आणि ८६ किलो वजन उचलून सुवर्णपदकावर नाव कोरले. 

मीराबाई चानूकडून भारताला पदकाची आशा होती. मीराबाईनेही तिच्या चाहत्यांना निराश केले नाही. मीराबाईने फक्त सुवर्णपदकाचीच कमाई केली नाही, तर तिने हे सुवर्णपदक विक्रमी कामगिरी नोंदवून पटकावले. तिसऱ्या प्रयत्नात ८६ किलो वजन उचलून मीराबाईने राष्ट्रकुल स्पर्धेत विक्रमी कामगिरीची नोंद केली. याआधी ऑगस्टिना नवाओकोलोने २०१० मध्ये नवी दिल्लीत आयोजित करण्यात आलेल्या राष्ट्रकुल स्पर्धेत ७७ किलो वजन उचलून विक्रम केला होता. हा विक्रम मीराबाई चानूने मोडीत काढला. 

राष्ट्रकुल स्पर्धेत भारताच्या वेटलिफ्टर्सनी चांगली कामगिरी केली आहे. गुरू राजाने 56 किलो वजनी गटात रौप्य पदकाची कमाई करत भारताला स्पर्धतील पहिले पदक मिळवून दिले. 28 वर्षीय गुरू राजाने 249 किलो वजन उचलत रौप्यपदकाची कमाई केली. सुरूवातीला गुरूराजाने 111 किलो वजन उचलले. यानंतर तिसऱ्या फेरीत त्याने 138 किलो वजन उचलण्याची कामगिरी केली. शेवटच्या फेरीत 249 किलो वजन उचलत गुरू राजाने रौप्य पदक मिळवले.