थंडरकॅट्सकडून संगम एफसी पराभूत

आकाश शशीकुमार व अक्षय नायर यांनी नोंदविलेल्या प्रत्येकी दोन गोलांच्या जोरावर थंडरकॅट्स अ संघाने पुणे फुटबॉल लीग स्पर्धेत सुपर डिव्हिजन गटात संगम एफसी अ संघाचा २-१ असा पराभव करून आगेकुच केली

पुणे : आकाश शशीकुमार व अक्षय नायर यांनी नोंदविलेल्या प्रत्येकी दोन गोलांच्या जोरावर थंडरकॅट्स अ संघाने पुणे फुटबॉल लीग स्पर्धेत सुपर डिव्हिजन गटात संगम एफसी अ संघाचा २-१ असा पराभव करून आगेकुच केली.
पुणे जिल्हा फुटबॉल संघटने (पीडीएफए) तर्फे लोणी येथील डीएसके फुटबॉल मैदानावर सुरू असलेल्या या स्पर्धेत साखळी फेरीत सामन्यात थंडरकॅट्स अ संघाने संगम एफसी अ संघावर निर्विवाद वर्चस्व गाजवले. १३व्या मिनिटाला संगम एफसीच्या दिपक पाटीलने आकाश मंडलच्या पासवर गोल करून संघाचे खाते उघडले. त्यानंतर थंडरकॅट्सच्या अक्षय नायर, आकाश शशीकुमार यांनी आक्रमक चाली रचल्या, पण त्यात त्यांना यश आले नाही. पुर्वाधात ही आघाडी कायम होती. उत्तरार्धात मात्र, थंडरकॅटस्च्या खेळाडूंनी आपल्या खेळात नवीन रणनीती आखत जोरदार चढायांना प्रारंभ केला. ७७व्या मिनिटाला आकाश शशीकुमार याने मिळालेल्या संधीचे सोने करत सोलो गोल करून संघाला बरोबरी साधून दिली. ८५व्या मिनिटाला थंडरकॅटस्च्या अराफत शेखने दिलेल्या पासवर अक्षय नायरने गोल नोंदवून संघाला सामन्यात २-१अशी महत्वपूर्ण आघाडी मिळवून दिली. त्यानंतर थंडरकॅट्सच्या खेळाडूंनी बचावात्मक धोरण स्विकारले व सामन्यात शेवटपर्यंत आपली आघाडी कायम ठेवत विजय मिळवला.