पाकिस्तानी क्रिकेट जर्सीवर धोनीचं नाव आणि नंबर

मेलबर्न, दि. 29 - भारतीय एकदिवसीय संघाचा कर्णधार महेंद्रसिंग धोनीचे चाहते फक्त भारतात नाही तर जगभरात आहेत. जगातल्या प्रसिद्ध क्रिकेटर्समध्ये धोनीदेखील आहे. जगातला असा कोणताच देश नसेल जिथे धोनीचे चाहते सापडणार नाहीत. भारतात धोनीचे करोडो चाहते आहेत, इतकंच कशाला पाकिस्तानमध्येही त्याचे अनेक चाहते आहेत. मेलबर्नमध्ये पाकिस्तान आणि ऑस्ट्रेलियामध्ये पार पडलेल्या बॉक्सिंग डे टेस्टदरम्यान असाच पाकिस्तानचा एक चाहता पहायला मिळाला ज्याने पाकिस्तानी क्रिकेट संघाची जर्सी घातली होती, पण त्याच्यावर नाव होतं महेंद्रसिंग धोनीचं. 

 

धोनीचा हा चाहता पाकिस्तानची जर्सी घालून फिरत होता. पण त्यावर धोनीचं लिहिलं होतं, एवढंच नाही तर धोनीच्या जर्सीवर असणार सात क्रमांकही त्याच्या जर्सीवर होता. स्टेडिअममधील उपस्थितांची नजर जेव्हा त्याच्यावर पडली तेव्हा सगळ्यांसाठी तो एक चर्चेचा विषय ठरला. सोशल मीडियावर सध्या त्याचे फोटो व्हायरल होत आहेत. महत्वाचं म्हणजे पठाणकोट आणि उरीमध्ये झालेल्या दहशतवादी हल्ल्यानंतर भारत - पाकिस्तानमधील संबंध ताणले गेले आहेत. 

 

याअगोदरही पाकिस्तानात विराट कोहलीच्या एका चाहत्याला जेलची हवा खावी लागली होतो. आपल्या घरावर तिरंगा फडकावल्यानंतर त्याला अटक करण्यात आली होती. पाकिस्तानी क्रिकेटर शाहीद अफ्रिदीच्या एका चाहत्याला भारतात अटक झाली होती. 

 

पाकिस्तानचे माजी राष्ट्राध्यक्ष जनरल परवेज मुशर्रफदेखील महेंद्रसिंग धोनीचे चाहते आहेत. 2007 मध्ये त्यांनी धोनीच्या लांब केसांची प्रशंसा केली होती. गेल्यावर्षीही त्यांनी धोनी एक चांगला आणि मनोरंजक खेळाडू असल्याचं म्हटलं होतं.