बागान बनला चौदाव्यांदा फेडरेशन कप चॅम्पियन

जेजे लालपेखलुआचे शानदार २ गोल आणि सोनी नोर्डे याच्या जादुई कामगिरीने मोहन बागानने एजल एफसी संघावर ५-० असा दणदणीत विजय मिळविताना १४ व्यांदा हीरो फेडरेशन कप फुटबॉल स्पर्धेत विजेतेपद पटकाविले.

गुवाहाटी : जेजे लालपेखलुआचे शानदार २ गोल आणि सोनी नोर्डे याच्या जादुई कामगिरीने मोहन बागानने एजल एफसी संघावर ५-० असा दणदणीत विजय मिळविताना १४ व्यांदा हीरो फेडरेशन कप फुटबॉल स्पर्धेत विजेतेपद पटकाविले.
येथे इंदिरा गांधी अ‍ॅथलेटिक्स स्टेडियममध्ये झालेल्या विजेतेपदाच्या लढतीत मध्यंतरापर्यंत दोन्ही संघांना गोलचे खाते उघडता आले नव्हते; परंतु उत्तरार्धात बागानने जबरदस्त खेळ करताना ४८, ५८, ७३, ८२ आणि ८८ व्या मिनिटाला गोल करीत विजेतेपदावर शिक्कामोर्तब केला.
बागानकडून सोनी नोर्डेने ४८ व्या मिनिटाला गोल केला. विक्रमजितने एजलच्या बॉक्समध्ये चेंडू पोहोचवला, तर स्ट्रायकरने जेजे लालपेखलुआकडून पास घेताना तो नोर्डेकडे दिला आणि नोर्डेने गोलरक्षकाला चकवताना गोल केला.
दहा मिनिटांनंतर धनचंद्रसिंहने बागानतर्फे दुसरा गोल केला. कुत्सुमीच्या कॉर्नरवर धनचंद्रने हेडरद्वारे बागानची आघाडी दुप्पट केली. त्यानंतर सामन्याच्या ७३ व्या मिनिटाला जेजेने गोल करीत बागानची आघाडी ३-० अशी पोहोचवली.
८३ व्या मिनिटाला सोनी नोर्डेने डावीकडून अनेक खेळाडूंना चकवले आणि विक्रमजितकडे पास दिला आणि विक्रमजितने बागानतर्फे चौथा गोल केला.
सामना संपण्यास दोन मिनिटे बाकी असताना अजहरुद्दीन मलिकने डाव्या बाजूने दिलेल्या क्रॉसवर जेजे याने त्याचा दुसरा आणि बागानचा पाचवा गोल नोंदवला.
(वृत्तसंस्था)