अखेर धडाकेबाज ऋषभ पंतला "चान्स" मिळणार ?

किंगस्टन, दि. 9 - वेस्ट इंडिजविरूद्धची पाच एकदिवसीय सामन्यांची मालिका भारतीय संघाने 3-1 अशी खिशात घातली. या मालिकेसाठी भारतीय चमूमध्ये यष्टीरक्षक-फलंदाज ऋषभ पंत आणि चायनामॅन गोलंदाज कुलदिप यादव यांचा समावेश होता. यापैकी कुलदिपने पाचही सामने खेळले मात्र ऋषभ पंतला एकाही सामन्यात संधी मिळाली नाही. अखेरच्या सामन्यात ऋषभ पंतला संधी मिळेल अशी क्रिकेट चाहत्यांना अपेक्षा होती मात्र, अखेरच्या सामन्यातही ऋषभला संधी न मिळाल्याने सोशल मीडियावर रोष व्यक्त झाला होता. त्यामुळे आज होणा-या एकमेव टी-20 लढतीमध्ये ऋषभ पंतला चान्स मिळण्याची शक्यता वर्तवली जात आहे. 

 

या एकमेव टी-20साठी भारतीय संघ  भारतीय संघ डावपेच व संघ यात बदल करू शकतो. या वर्षीच्या सुरूवातीला इंग्लंडविरोधात बंगळुरू येथे झालेल्या टी-20 सामन्यात पंतला संधी मिळाली होती. धोनीनंतर भविष्यातील यष्टीरक्षक म्हणून पंतकडे पाहिलं जात आहे. याशिवाय या सामन्यात कर्णधार विराट कोहली सलामीवीराची भूमिका बजावेल, अशी दाट शक्यता वर्तवली जात आहे. एकदिवसीय सामन्यांमध्ये रोहित शर्माच्या अनुपस्थितीत शिखर धवन आणि अजिंक्य रहाणे ही जोडी सलामीला आली. या एकमेव टी-20त विराट कोहली सलामीला येण्याची शक्यता आहे. आयपीएलमध्ये रॉयल चॅलेंजर्स बेंगळुरूकडून कोहली सलामीला येतो.

पाच सामन्यांची वन-डे मालिका ३-१ अशी जिंकणाऱ्या भारताला टी-२० जिंकून मालिकेचा शानदार समारोप करायचा आहे. यासाठी ख्रिस गेलच्या फलंदाजीवर अंकुश लावावा लागेल. खराब फॉर्म आणि जखमांशी झुंज देणारा गेल १५ महिन्यांनंतर राष्ट्रीय संघात परतला. आयपीएलमध्येहीतो अपयशी ठरला होता.

 

विंडीज संघ या प्रकारात सध्या विश्वविजेता असून संघात गेलसह मार्लोन सॅम्युअल्स, सुनील नारायण, सॅम्युअल बद्रीसारखे मॅचविनर आहेत. टी-२० चा तज्ज्ञ कार्लोस ब्रेथवेट कर्णधार असेल. मागच्या वर्षी फ्लोरिडात भारताविरुद्धच्या टी-२० त ४९ चेंडूंत शतक झळकविणारा एव्हिन लुईस याचादेखील संघात समावेश आहे. या लढतीसाठी भारतीय संघ डावपेच व संघ यात बदल करू शकतो. रोहितच्या अनुपस्थितीत कोहली सलामीला खेळण्याची शक्यता आहे. युवा ऋषभ पंतला दौऱ्यात प्रथमच संधी दिली जाईल. भविष्यातील वन-डे यष्टिरक्षक म्हणून पंतकडे पाहिले जात आहे. कुलदीप यादवदेखील संघात असेल. तो वेगवान भुवनेश्वर व उमेश यादवनंतर फिरकीची बाजू सांभाळेल. विंडीजच्या आक्रमणाची भिस्त नारायण व बद्रीवर राहील. नारायण फलंदाजीत सलामीला खेळू शकतो.

भारत : विराट कोहली (कर्णधार), शिखर धवन, अजिंक्य रहाणे, महेंद्रसिंह धोनी, युवराजसिंग, केदार जाधव, हार्दिक पांड्या, ऋषभ पंत, रवींद्र जडेजा, रविचंद्रन आश्विन, कुलदीप यादव, भुवनेश्वर कुमार, उमेश यादव, दिनेश कार्तिक आणि मोहम्मद शमी.

 

वेस्ट इंडीज : कार्लोस ब्रेथवेट (कर्णधार), सॅम्युअल बद्री, रोन्सफोर्ड बीटन, ख्रिस गेल, एव्हिन लुईस, जेसन मोहम्मद, सुनील नारायण, किरॉन पोलार्ड, रोवमॅन पॉवेल, मार्लोन सॅम्युअल्स, जेरोम टेलर, चाडविक वॉल्टन, केसरिक विल्यम्स.

 

स्थळ : सबीना पार्क, किंग्जस्टन, जमैका

 

सामन्याची वेळ : रात्री ९ वाजल्यापासून