हॉकी

द�

��नानाथची एसएफएसवर ५-० ने मात
व्हीएचए आंतरमहाविद्यालय हॉकी : हिस्लॉप संघाचा विजय
नागपूर : विदर्भ हॉकी संघटनेतर्फे आयोजित आंतरमहाविद्यालय हॉकी स्पर्धेत गुरुवारी खेळल्या गेलेल्या लढतीत एसएफएस व हिस्लॉप महाविद्यालच्या संघांनी आपापल्या प्रतिस्पर्ध्यांवर मात केली. व्हीएचएच्या मैदानावर खेळल्या गेलेल्या लढतींमध्ये दीनानाथने एसएफएसचा ५-० ने तर हिस्लॉप महाविद्यालयाने जीएस महाविद्यालयाचा २-० ने पराभव केला.
पहिल्या लढतीत दीनानाथने सुरुवातीपासून वर्चस्व गाजवले. नवव्या मिनिटाला नवीन काथोटेने संघाचे खाते उघडले. त्यानंतर तीन मिनिटांनी पीयूष गौरने संघातर्फे दुसरा गोल नोंदविला. अकबर अन्सारीने १५ व्या मिनिटाला दीनानाथ संघाला ३-० अशी आघाडी मिळवून दिली. राहुल कलाकोटी (२२ वा मिनिट) आणि मोहित काथोटे (२६ वा मिनिट) यांनी चार मिनिटांच्या अंतरात प्रत्येकी एक गोल नोंदवीत संघाचा विजय निश्चित केला.
अन्य सामन्यात अश्विन झेव्हिअरने (६ वा मिनिट) सुरुवातीलाच गोल नोंदवीत हिस्लॉप संघाला १-० अशी आघाडी मिळवून दिली. १-० ने पिछाडीवर पडलेल्या जीएस संघाच्या खेळाडूंनी त्यानंतर आक्रमक खेळ केला. पण त्यांना हिस्लॉप संघाच्या बचाव फळीला भेदण्यात अपयश आले. २४ व्या मिनिटाला अंशुल खांडेकरने चेंडूला गोलजाळ्याचा मार्ग दाखवीत हिस्लॉप संघाच्या विजयावर शिक्कामोर्तब केले.
शुक्रवारी या स्पर्धेत दीनानाथ विरुद्ध ज्योतिबा शारीरिक शिक्षण महाविद्यालय (सकाळी ९.३० वाजता) आणि सिंधू महाविद्यालय विरुद्ध हिस्लॉप महाविद्यालय (सकाळी १०.३० वाजता) संघांदरम्यान लढती होतील. (क्रीडा प्रतिनिधी)