भारताची हाराकिरी, इंग्लंडचा २६६ धावांनी विजय

साऊदम्प्टन, दि. ३१ - कसोटीच्या पहिल्या दिवसापासून इंग्लंडने सामन्यावर मिळवलेली पकड अजिबात ढिली न सोडता भारताला तिस-या कसोटीत २६६ धावांनी धूळ चारली. इंग्लंडच्या ४४५ धावांचा पाठलाग करताना भारताचा दुसरा डाव अवघ्या १७८ धावांमध्ये संपुष्टात आला आणि इंग्लंडने तिसरी कसोटी जिंकत पाच सामन्यांच्या कसोटी मालिकेत १ -१ अशी बरोबरी केली. अजिंक्य रहाणेने पहिल्या डावाप्रमाणेच दुस-या डावातही चांगला खेळ करत (५२) भारताचा  डाव सावरायचा प्रयत्न केला मात्र त्याला इतर फलंदाजांची पुरेशी साथ न मिळाल्याने भारताचा डाव गडगडला. इंग्लंडतर्फे मोईन अलीने तब्बल ६ बळी टिपले तर अँडरसनने २ व रूटने १ गडी बाद केला. 

टॉस जिंकून प्रथम फलंदाजी स्वीकारणा-या इंग्लंडतर्फे कप्तान (९५), बॅलन्स ( १५६) आणि बेल (१६७) यांनी दमदार फलंदाजी करत भारतापुढे ५६९ धावांचे आव्हान ठेवले. या आव्हानाचा पाठलाग करताना रहाणे (५४) व धोनीशिवाय (५०) भारताचा कोणीही फलंदाज जास्त टिकू शकला नाही आणि परिणामी भारताचा डाव ३३० धावांवरच संपुष्टात आला. इंग्लंडने भारताला फॉलोऑन न देता दुस-या डावाचीही चांगली सुरूवात केली. कूकच्या ७० धावांच्या नाबाद खेळीमुळे इंग्लंडने २०५ धावांचा टप्पा ओलांडला आणि त्यानंतर डाव घोषित करत भारतापुढे जिंकण्यासाठी ४४५ धावांचे आव्हान ठेवले.

मात्र दुस-या डावातही भारतीय फलंदाज खास खेळ करू शकले नाहीत व भारताचा डाव अवघ्या १७८ धावांवर संपुष्टात आला आणि इंग्लंडने तब्बल २६६ धावांनी तिसरी कसोटी जिंकली.