वाहनचालकाची कन्या बनणार भारतीय बॉक्सिंगचे भविष्य

गुवाहाटी : मिझोरामच्या दुर्गम भागात वास्तव्य करणारी १७ वर्षांची युवा खेळाडू भारतीय बॉक्सिंगचे भविष्य बनू पाहत आहे.

किशोर बागडे थेट गुवाहाटी येथून...
गुवाहाटी : मिझोरामच्या दुर्गम भागात वास्तव्य करणारी १७ वर्षांची युवा खेळाडू भारतीय बॉक्सिंगचे भविष्य बनू पाहत आहे. वाहनचालकाच्या या मुलीने या खेळातील चार वर्षांच्या वाटचालीत प्रेरणादायी कामगिरी केली. वनलालरियात पुई असे तिचे नाव.
येथील कर्मवीर नवीनचंद्र बार्डोलाय इनडोअर स्टेडियममध्ये रविवारी सुरू झालेल्या स्पर्धेदरम्यान ‘लोकमत’शी संवाद साधताना बॉक्सिंगमधील पदार्पणात आलेले अडथळे तिने कथन केले. तिच्या गावात सोयी-सुविधांचा अभाव असला तरी खेळात कामगिरी उंचावून गावाच्या हितासाठी काहीतरी करण्याचा निर्धार तिच्या बोलण्यातून जाणवला.
वडील झेड. एच. झोलियाना हे सुमोचालक म्हणून नोकरी करतात. आई घरकाम करते. पाठीशी दोन लहान भाऊ आहेत. संसाराचा गाडा ओढण्यात आईची मदत करीत असताना वनलालरियात पुई शाळेत मुलांसोबत खेळताना भांडणाात त्यांना पुरून उरायची. त्यातूनच आठवीला असताना ती बॉक्सिंगकडे वळली. पुढे राजधानीचे ठिकाण असलेल्या आयजोल शहरात पुईला भारतीय क्रीडा प्रशिक्षण केंद्रात प्रवेश मिळाला. तेव्हापासून पुईचे आयुष्यच बदलून गेले. ६० किलो गटात सध्याच्या स्पर्धेत उपांत्यपूर्व फेरीचा सामना तिला कोरियाच्या प्रतिस्पर्धीविरुद्ध खेळायचा असला तरी ती तितकीशी चिंताग्रस्त जाणवली नाही.
राष्टÑीय ग्रामीण क्रीडा स्पर्धेत २०१४ मध्ये पदक जिंकल्यानंतर तिने कधीही मागे वळून बघितलेले नाही. यंदा नवी दिल्लीत झालेल्या पहिल्या यूथ बॉक्सिंग स्पर्धेत तिने आपल्या गटात सुवर्णपदक जिंकले होते. राष्टÑीय स्पर्धेत सुवर्ण, रौप्य आणि कांस्य जिंकल्यानंतर आॅगस्ट महिन्यात सर्बियात झालेल्या गोल्डन ग्लोव्हज आंतरराष्टÑीय बॉक्सिंग स्पर्धेत पुईने देशासाठी सुवर्णमय कामगिरी करताच संभाव्य भारतीय संघासाठी तिची निवड झाली. कुटुंबासाठी आणि देशासाठी पदक जिंकण्याचे स्वप्न उराशी बाळगून पुई सध्या सरावात व्यस्त आहे. पदक मिळाल्यास राज्य सरकार मदतीला धावून येईल, तसेच लहान भावांच्या शिक्षणासाठी पैसा उभारता येईल, असे तिने सांगितले.
शांत आणि संयमी असलेली पुई घरापासून दूर आहे. घरची आठवण येते का, असे विचारताच ती म्हणाली, ‘साईच्या केंद्रात सराव आणि अकरावीच्या शिक्षणाची तयारी अशी दैनंदिनी आहे, पण घरच्यांची आठवण अनेकदा भाावूक करून सोडते. प्रशिक्षकांच्या सूचनेनुसार मोबाईलवर अधिक बोलता येत नाही. आठवड्यात एकदाच संपर्क होतो. यामुळे अधिक भावनाप्रधान होण्याआधी मी मात्र ग्लोव्हज घालून सरावात व्यस्त होते.’
>वनलालरियात पुई एआयबीए युवा महिला विश्व बॉक्सिंग स्पर्धेत ६० किलो वजन गटात भारताचे प्रतिनिधित्व करेल. टोकिओ आॅलिम्पिकची आशा बाळगायची असेल तर हीच खरी संधी आहे, या निर्धारासह ती रिंगणात उतरणार आहे.